Катонқарағай ауданына қарасты Қызыл жұлдыз ауылында тұрмыстық химия өндірісі дамып келеді. Өндірісте сұйық иіс сабын, кір жуғыш заттар, антифриз, кілем және көлік жууға арналған сұйықтықтар мен басқа да тұрмыстық химия өнімдері шығарылады. Бұл — ауыл тұрғыны, жеке кәсіпкер Талғат Бақтыбаевтың табанды еңбегінің нәтижесі, деп хабарлайды  Altainews.kz тілшісі.

Бүгінде өндіріс орнында алма, бүлдірген және лимон хош иісті сұйық сабынның үш түрі бес литрлік құтыда шығарылуда. Кәсіпкер күн сайын 10–20 құты өнім өндіреді. Алдағы уақытта өндіріс көлемін ұлғайтып, өнім түрлерін көбейту көзделіп отыр.

Цехтың көлемі небәрі 35 шаршы метр болса да, бұл шағын өндіріс орны ауыл тұрғындары үшін жаңа жұмыс орындарын ашуға мүмкіндік беруде. Сонымен қатар, жергілікті өнімді тұтыну мәдениетін қалыптастыруға да өз үлесін қосып келеді.

Әкімдікте атап өткендей, Талғат Бақтыбаевтың бұл бастамасы ауыл шаруашылығы мен шағын кәсіпкерлікті ұштастыра отырып, ауыл экономикасын дамытуға нақты серпін беруде.

Фото: Катонқарағай аудандық әкімдігінен