Өскемен жаңалықтары
Өскеменде автоклавты газбетон өндіретін заманауи кәсіпорынның құрылысы жүріп жатыр. Бұл жоба Шығыс Қазақстанда бұрын-соңды болмаған технологиялық өндірісті жолға қоюға мүмкіндік береді. Аталмыш нысан «Ертіс» әлеуметтік-кәсіпкерлік корпорациясы мен «Ecoton-Shygys» ЖШС арасындағы бірлескен қызмет туралы келісім аясында жүзеге аспақ. Өндірістің басты ерекшелігі – экологиялық тұрғыдан тиімді әрі экономикалық табысты өнім шығару.
Зауыт жылына 120 мың текше метрге дейін автоклавты газбетон блоктарын өндіруге қауқарлы болмақ. Өнімдер әртүрлі көлем мен тығыздықтағы блоктардан тұрады, оларды заманауи, жылу үнемдейтін тұрғын үйлер мен ғимараттар салуда қолдану көзделіп отыр. Ең бастысы – өндірістің негізгі шикізаты ретінде жергілікті жылу электр станцияларының күл-қоқысы мен күл үйінділері пайдаланылатын болады. Бұл арқылы жыл сайын шамамен 30 мың тонна өнеркәсіптік қалдық қайта өңделіп, құрылыс материалына айналады. Сонымен қатар, өндіріс шығындары 10–15 пайызға дейін қысқарып, өнімнің бағасы да халыққа қолжетімді болмақ.
Жобаның жалпы құны – 4,04 млрд теңге. Соның ішінде 1,4 млрд теңгеге жуық қаражатты кәсіпорынды жаңғырту мен жабдықтауға «Ертiс» ӘКК» АҚ инвестиция ретінде салуда. Қалған бөлігі – жеке серіктестің жер телімі, өндірістік ғимараттар мен құрал-жабдықтары түріндегі өз үлесі. Тараптар арасындағы қатынас үлесі - 35 пайызы әлеуметтік-кәсіпкерлік корпорация үлесі, 65 пайызы – инвестордың қаражаты. Жобаны толық іске қосу 2025–2026 жылдарға жоспарланып отыр.
Айта кету керек, кәсіпорын 100-ден астам адамды тұрақты жұмыспен қамтып, орташа айлық жалақы 250–350 мың теңге көлемінде белгіленген. Сонымен қатар, логистика, сервистік қызметтер мен тасымал салаларында қосымша 200-ге жуық жаңа жұмыс орны ашылмақ. Өңір колледждерімен бірлесе отырып, техникалық маман даярлау жұмыстары да басталмақ.
Жобаның әлеуметтік-экономикалық мультипликативтік әсері де ауқымды. Шикізат, көлік және қызмет көрсетуге арналған жылдық тапсырыстар 650 млн теңгеден асады. Ал бюджетке түсетін салықтық төлемдер 165 млн теңгеге дейін артады деп күтілуде. Бұл қаражаттар денсаулық сақтау, білім беру және әлеуметтік инфрақұрылымды дамытуға бағытталмақ.
Экологиялық тұрғыдан алғанда, жоба – «жасыл экономика» қағидаттарына толық сай келеді. Күл қалдықтарын өңдеу арқылы табиғи инертті материалдарға деген сұраныс азайып, көмірқышқыл газының атмосфераға таралуы жыл сайын 8–10 мың тоннаға қысқарады. Ал газбетон блоктан салынған үйлердің жылу үнемдеуі арқасында халықтың коммуналдық шығындары да айтарлықтай төмендеп, өңірлік энергия жүйесіне түсетін жүктеме де жеңілдемек.
Болашақта бұл кәсіпорын жыл сайын 800-ге дейін жеке тұрғын үй немесе 50-ге жуық көппәтерлі тұрғын үй салуға мүмкіндік береді. Құрылыс шығыны 15–20 пайызға төмендеп, «Нұрлы жер» сияқты баспанамен қамту бағдарламаларының тиімді жүзеге асуына жол ашылады.
Жоба – мемлекеттік қолдау мен жеке бастаманың үйлесімді үлгісі. 2025 жылдың 26 маусымында бес жыл мерзімге жасалған әріптестік келісім – бұл Шығыс Қазақстандағы өнеркәсіптік жаңғырудың нақты көрінісі.
Күршім ауданы әлеуметтік-экономикалық дамудың жаңа кезеңіне қадам басады. Бұқтырманың жағалауы мен Қиын-Керіштің әсем табиғаты ғана емес, агроөнеркәсіп, туризм, инфрақұрылым мен әлеуметтік салада қолға алынған ауқымды жобалар да өңірдің әлеуетін арттыра түсуде. Жаңа қонақ үйлер мен өндіріс орындары іске қосылып, жолдар жаңарып, ауылдар таза ауыз сумен толық қамтылды. Алдағы жылдары ауданға ондаған миллиард теңге инвестиция салынып, мал шаруашылығынан бастап туризмге дейінгі салаларға тың серпін берілмек. 2027 жылға дейін әр ауыл интернетке қол жеткізіп, тұрғындардың өмір сапасы айтарлықтай жақсарады. Күршімнің бүгінгі қадамы – ертеңгі өркендеудің кепілі, деп хабарлайды Altainews.kz тілшісі.
Шығыс Қазақстан облысының әкімі Нұрымбет Сақтағанов Күршім ауылында жергілікті тұрғындармен кездесіп, ауданның әлеуметтік-экономикалық даму барысы мен алдағы жоспарларды таныстырды.
Күршім ауданында туризм, агроөнеркәсіп, өнеркәсіп және адами капиталды дамытуға мүмкіндік мол. 2029 жылға дейін ауданға 28,3 млрд теңге бюджет қаражаты және 19,1 млрд теңге жеке инвестиция салу жоспарланған. Соңғы жылдары бірнеше қонақ үй, құрылыс дүкендері, монша кешені және алтын өндіру зауыты іске қосылды. Биыл Бұқтырма жағалауында демалыс үйлері, Күршім ауылында жаңа қонақжайлар мен Сарыөлеңде балық шаруашылығы тоғаны ашылмақ.
Ветеринарлық техникаға қол жеткізді
Биыл облыста 12 жылда алғаш рет ветеринариялық ұйымдардың автопаркі толық жаңартылды. Күршім ауданына 10 бірлік техника бөлінді, оның ішінде пикап, «Соболь» шағын автобустары, «Шевроле Кобальт» және мал тасымалдауға арналған көлік бар.
«Агроөнеркәсіптік кешен – аудан экономикасының негізгі бөлігі және облыс экономикасының төрт пайызын құрайды. Күршім ауданында негізінен етті мал шаруашылығы басым. Бүгінде ірі қара – 46 мың бас, қой мен ешкі – 105,9 мың, жылқы – 23,7 мың басқа жетті», – деді облыс әкімі.
Биыл алты айда аудан бойынша 2,6 мың тонна ет өндірілген. Бұл – облыс көлемінің 3,8 пайызы. Алайда жұмыс істеп тұрған бес бордақылау алаңының жүктемесі небәрі 20 пайызды ғана құрайды.
Кездесуде «Ауыл аманаты» бағдарламасы аясындағы нәтижелер де сөз болды. Өткен жылы Күршім кәсіпкерлеріне 47,8 млн теңгеге бес жоба қаржыландырылса, биыл 82,5 млн теңгеге 11 жоба мақұлданған.
Мал қорымдарына қатысты да маңызды тапсырма берілді.
«Күршім ауданының әкімі Мейіржан Әлбековке ветеринария және құрылыс басқармаларымен бірлесіп, Құйған, Маралды, Бурабай, Ақсуат және Сарыөлең ауылдарында салынып жатқан бес мал қорымын уақытында аяқтауды тапсырамын. Сондай-ақ, 2026-2027 жылдары кезең-кезеңімен салынатын қалған 18 мал қорымына арналған жобалық-сметалық құжаттаманы дайындау қажет», – деді Нұрымбет Сақтағанов.
Туризмді дамытуға басымдық берілмек
2024 жылы ауданға қатынаған туристер саны 35 пайызға өсіп, 2,7 мың адамға жеткен (2023 жылы – 2,0 мың адам). Өңірде туристерді қабылдайтын төрт нысан бар: Күршім ауылында 64 орындық үш қонақ үй және Сарыөлең ауылында 100 орындық балалар лагері.
Аймақ басшысы туризмнің дамуы тек демалыс орындарын ашумен шектелмейтінін де атап өтті.
40 шақырымнан астам жол жөнделеді
Биыл ауданда 742 млн теңгеге 41 шақырымнан астам жол мен көше жөнделіп, бірқатар маңызды магистральдар және айналма жол құрылысы жалғасады.
Күршімде былтыр екі млрд теңгеге 47 шақырым жол мен көше жөнделді. Оның ішінде облыстық маңызы бар «Күршім-Қалжыр-Бурабай» жолының 12-27 шақырымы, аудандық маңызы бар «Күршім-Қалжыр-Ақши» жолының сегіз шақырымы, «Маралды-Үшбұлақ» жолының екі шақырымы, «Күршім-Алғабас» жолының екі шақырымы жөнделді. Бірлік, Бурабай, Ақши, Қаратоғай, Үшбұлақ, Алғабас, Құйған, Күршім ауылдарындағы 20 км көше мен көпірлер қалпына келтірілді.
Биыл жөнделетін нысандар тізімінде «Күршім-Қалжыр-Бурабай» автожолы, «Күршім-Қалжыр-Ақсуат» жолы, «Күршім-Алғабас» жолы бар. Алғабас ауылындағы бір шақырымдық көше, Күршім ауылындағы 6,2 км көше жөнделуде.
Сонымен қатар, Күршім ауылында айналма жол салу мәселесі ерекше бақылауда тұр. Мердігер «Терезе» ЖШС қазіргі уақытта 12 шақырымның алты шақырымына жол негізін қалау жұмыстарын жүргізіп жатыр.
Облыс әкімі Күршім ауданының әкімі Мейіржан Әлбековке бірінші қыркүйекке дейін жолаушылар көлігі және автомобиль жолдары, экономика және бюджеттік жоспарлау басқармаларымен бірлесіп, айналма жол құрылысына қосымша қаржы бөлу мәселесін пысықтауды тапсырды.
Күршім 100% таза ауыз сумен қамтылған
Мемлекет басшысы 2025 жылға дейін қазақстандықтарды толығымен таза ауыз сумен қамтамасыз ету міндетін қойған. Бұл бағытта Күршім ауданы айтарлықтай нәтижеге қол жеткізді – аудандағы барлық 21 ауыл орталықтандырылған сумен жабдықталған.
Халықтың ауыз суға қолжетімділігі 100 пайызды құрайды.
Сонымен бірге, су инфрақұрылымын одан әрі жақсарту үшін жалпы құны жетіі млрд теңгені құрайтын екі ірі жоба жүзеге асырылып жатыр.
Атап айтқанда, Барақ батыр ауылында су құбыры желілерінің құрылысы жалғасуда. Биыл бұл мақсатқа 131,6 млн теңге бөлінді, нысан 2025 жылы аяқталмақ. Күршім ауылында су құбыры желілерін қайта жаңарту қолға алынды. Жобаны іске асыруға биыл 208,4 млн теңге бөлінді, толық аяқтау мерзімі – 2026 жыл.
Бұл жобалар жүзеге асқан соң, аудандағы ауыз су жүйесінің сапасы артып, тұрғындардың тұрмыс жағдайы жақсара түспек.
2027 жылдың соңына дейін Күршім ауданының барлық ауылдары интернетпен қамтылады
Шығыс Қазақстан облысының әкімі Нұрымбет Сақтағанов Күршім ауданының тұрғындарымен кездесуде интернетке қолжетімділікті арттыру бағытында атқарылып жатқан жұмыстарға тоқталды. 2027 жылдың соңына дейін ауданның барлық ауылдарын интернетпен қамту жоспарланып отыр.
Атап айтқанда, Бурабай, Теректібұлақ, Топтерек, Ақши, Егіндібұлақ, Күршім-Қыстау, Қайнар, Жолнұсқау, Үшбұлақ және Қаратоғай ауылдарында интернет мәселесі өзекті болып отыр.
Өткен жылы байланысты жақсарту үшін Жолнұсқау, Үшбұлақ, Қаратоғай және Егіндібұлақ (Қараой ауылы үшін) елді мекендерінде биіктігі 40 метр болатын төрт антенна орнатылды. Жобаның құны – 626,8 млн теңге. Қазіргі уақытта байланыс операторлары нысандарды тексеріп, одан арғы жұмыстарға дайындық жүргізуде.
Қалған ауылдарды интернетпен қамту ұялы байланыс операторларымен бірлесіп, 2027 жылдың соңына дейін кезең-кезеңмен жүзеге асырылмақ.
Сонымен қатар, ауданның 18 мектебінде жоғары жылдамдықты интернетке қол жеткізу үшін «Starlink» жиынтықтары орнатылған.
Президент Қасым-Жомарт Тоқаев жуырда өткен жасанды интеллектіні дамыту мәселелеріне арналған кеңесте бұл технологияны елдің экономикалық өсімі мен ұлттық дербестігін қамтамасыз ететін стратегиялық басымдықтардың бірі деп атап өтті. Мемлекет басшысы жаһандық бәсекеге төтеп беру үшін Қазақстанда жасанды интеллектіні енгізу іс-қимыл жоспарын жүзеге асыру қажеттігін айтты, деп хабарлайды Altainews.kz тілшісі.
Осы мақсаттарға сай, Шығыс Қазақстанда жаңа оқу жылынан бастап білім сапасын түбегейлі жақсартуға бағытталған ауқымды жобалар қолға алынған болатын. Айталық, «Барлығына қолжетімді сапалы білім беру» ұлттық баяндамасы аясында облыстағы 105 мектеп «нысаналы» мәртебе алып, арнайы әдістемелік қолдауға ие болды. Сонымен қатар, өңір мектептерінде жыл басынан бері жасанды интеллект пен ойын жасау бағытында курстар ашылып, Өскемен мен Риддер қалаларында қосымша робототехника үйірмелері жұмысын бастаған-ды.
ШЫҒЫСТЫҢ ОҚУШЫЛАРЫ КОМПЬЮТЕРЛІК ОЙЫНДАР ЖАСАУДЫ МЕҢГЕРІП ЖҮР
Мемлекет басшысының бұған дейін берген тапсырмасы бойынша, халықаралық Astana Hub технопаркі базасында Қазақстан мектеп оқушыларының цифрлық дағдыларын дамытуға бағытталған ауқымды онлайн-платформа іске қосылған болатын. Бұл жоба аясында екі бағыт ерекше назарда: жасанды интеллект (AI), ойын жасау (Game Development).
Алғашқы кезеңде Қазақстан бойынша 300 педагог оқытудан өтті. Олардың ішінде Шығыс Қазақстандағы жеті білім беру ұйымының мұғалімдері болды.
Курстар edu.astanahub.com платформасы арқылы қашықтан өткізілді. Педагогтер осы жылдың қаңтар айынан бастап 10-шы сынып оқушыларына сабақ беруді бастады. Барлығы 319 оқушы оқытылуда, оның ішінде 143-і – жасанды интеллект бағыты бойынша, ал 176-сы – ойын жасау бағыты бойынша білім алуда.
Оқушылардың инженерлік және техникалық қабілеттерін дамыту мақсатында «Озық ұрпақ» жобасы аясында Өскеменнің төрт және Риддердің сегіз мектебінде робототехника үйірмелері ашылды. Аталған үйірмелерде балалар тек робот құрастырумен шектелмейді, олар бағдарламалау тілдерін үйренеді, механика және электроника негіздерін меңгереді, инженерлік жобаларды қорғап, жарыстарға қатысады. Қазір үйірмелерге 200-ден астам оқушы қатысып жүр. Жобаға қатысушылардың алғашқы нәтижелері де бар – бірнеше команда аймақтық робототехника жарыстарында жүлделі орындарға ие болды.
2024-2025 оқу жылында Шығыс Қазақстандағы білім беру жүйесі үш ірі бағытта ауқымды өзгерістерге бет бұрды: «нысаналы мектептерді» дамыту, цифрлық дағдыларды қалыптастыру және инженерлік-техникалық шығармашылықты қолдау. Бұл бастамалар бір-бірінен бөлек емес, керісінше, өзара байланысқан үш тірек болып отыр:
Егер бұл жобалар жүйелі түрде жалғасын тапса, 2030 жылға қарай білім сапасының композиттік индексі бойынша облысымыз еліміздің үздік бестігіне кіреді, цифрлық және техникалық бағыттағы түлектер саны көбейеді, мектеп бітірушілердің жоғары оқу орындарына түсу көрсеткіші артады, сондай-ақ, ауыл мен қала мектебі арасындағы білім сапасы алшақтығы қысқарады.
Шығыс Қазақстанның білім беру саласындағы жаңа бастамалары – жай ғана жекелеген жобалар жиынтығы емес, бұл – білім сапасын арттырудың интеграциялық моделі. Мұнда әдістемелік қолдау, заманауи технологиялар және шығармашылық инженерлік бағыт бір арнада тоғысып отыр.
105 ОҚУ ОРНЫ «НЫСАНАЛЫ МЕКТЕПТЕР» ЖОБАСЫНА ЕНДІ
Білім – кез келген өңірдің әлеуметтік-экономикалық дамуының басты тірегі. Қазір әлем елдері білім сапасын арттыруда жаңа технологиялар мен ғылыми зерттеулерге сүйеніп отыр. Шығыс Қазақстан да бұл үрдістен қалыс қалған жоқ. 2024-2025 оқу жылынан бастап өңірде бірқатар ауқымды бастама іске қосылды. Бұл жобалардың басты мақсаты – білім беру ұйымдарындағы сапаны арттыру, ауыл мен қала арасындағы алшақтықты азайтумен қоса, оқушылардың заманауи технологияларды меңгеруіне жол ашу.
Басқарма өкілі бұл бағыттағы жұмыстың стратегиялық маңызын атап өтті:
Облыс бойынша 343 мектептің ішінен 105 оқу орны «нысаналы мектеп» ретінде таңдалды. Өткен оқу жылынан бастап облыстың 25 толық жинақты мектебінде жоба іске аса бастады, ал алдағы жылдары оған 80 шағын жинақты мектеп қосылады.
Жанғазы Әліпбаевтың айтуынша, бұл іріктеу ауылдық аймақтардағы білім сапасына ерекше назар аударуға мүмкіндік береді:
«Нысаналы мектептер» жобасын тиімді жүргізу үшін білім басқармасы басшысының бұйрығымен жобалық кеңсе құрылды. Оның негізгі мақсаты – мақсатты мектептерге әдістемелік қолдау көрсету және жобаны өңір деңгейінде үйлестіру.
Кеңсе құрамына облыстық әдістемелік орталықтың мамандары, аудандық және қалалық әдістемелік кабинеттердің әдіскерлері кіреді. Жобалық кеңсе тек қағазбастылықпен айналыспайды. Оның жұмысы нақты нәтижеге бағытталған: мектептерге сапалы оқу бағдарламаларын енгізу, мұғалімдерге жаңа әдістемелерді үйрету, оқу үдерісіндегі проблемаларды жедел шешу. Кеңсе ай сайын мектептермен кездесулер өткізіп, оқу үрдісін бақылап отырады.
Жоба шеңберінде «нысаналы мектептердің» педагогтеріне арналған үш деңгейлі біліктілік арттыру курстары енгізілді. Өткен жылы 25 мектептің мұғалімдері базалық деңгейден өтті. 2025 жылы тағы 80 мектептің педагогтері оқытудан өтеді.
«ҚОНАҚЖАЙ ОТБАСЫ»: БИЫЛ ТІЛ МЕН ДӘСТҮРДІ 140 БАЛА МЕҢГЕРДІ
Білімге қатысты атап өтерлік тағы бір жайт, биылғы 15-30 маусым аралығында облыста «Қонақжай отбасы» жобасының үшінші маусымы сәтті аяқталды. Бұл жоба – балалардың жазғы демалысын тиімді өткізуімен қатар, олардың тілдік және мәдени ортада тәжірибе жинауына арналған ерекше бастама. Жоба Катонқарағай, Шемонаиха, Үлкен Нарын аудандарын қамтыды.
Жалпы, 140 бала мен 49 отбасы қатысқан бұл жоба балаларға қазақстандық көпмәдениеттіліктің нақты үлгісін көруге мүмкіндік берді. Қатысушылардың басым бөлігі – қазақ тілін ана тілі емес, екінші тіл ретінде үйреніп жүрген оқушылар.
Аудандық білім бөлімдері, ата-аналар және қонақжай отбасылар арасында үшжақты келісімшарт жасалды. Қабылдаушы отбасылар үшін білім басқармасы, төтенше жағдайлар департаменті және санитарлық-эпидемиологиялық бақылау департаменті өкілдерінің қатысуымен 36 сағаттық оқыту курстары өткізілді.
Нәтижесінде, тілді үйренуге мотивация артты – балалар тілді тек оқулық арқылы емес, күнделікті тұрмыста қолдануға үйренді, әлеуметтік-мәдени коммуникация қалыптасты – қонақжай отбасымен бірге өмір сүру арқылы балалар ұлттық салт-дәстүрлермен танысты. Сөздік қор байыды – практикалық тілдік ортада жаңа сөздер мен тұрақты тіркестерді меңгеру оңайырақ болды.
1 қыркүйектен бастап 18 жасқа дейінгі балалар мен жасөспірімдер қоғамдық көлікте жол ақысын төлемейді.
Бұл бастаманы шаһар басшысы Алмат Ақышов ұсынды. Осы жеңілдіктерге байланысты тасымалдаушылардың шығындары бюджет есебінен өтеледі.
Ескерте кетейік, балалар мен жасөспірімдерге валидаторға есепке алу үшін ONAY! картасын қолдану қажет.
Тарбағатай ауданында ауыл шаруашылығы саласының техникалық әлеуетін жаңарту мақсатында жүйелі жұмыстар атқарылуда. Бұл бағыттағы негізгі жұмыстар «Жол картасы» бағдарламасы аясында жүргізіліп, жаңа техникаларды сатып алу арқылы жүзеге асып жатыр, деп хабарлайды Altainews.kz тілшісі.
Өткен жылы ауданда 21 ауыл шаруашылығы техникасы мен 18 қосалқы бөлшек сатып алынған. Оның ішінде 17 техника жалпы 172,4 млн теңгеге лизинг арқылы алынса, қалған 4 техника 49,8 млн теңге көлемінде шаруашылықтардың өз қаражаты есебінен алынған. Сонымен қатар былтыр 48 ескі техника есептен шығарылды.
Бұл жаңартулар ауыл шаруашылығы саласына серпін беріп, еңбек өнімділігін арттыруға септігін тигізуде. Жаңа техника уақытты үнемдеп, сапалы өнім алуға жол ашады. Сонымен қатар шаруалардың шығынын азайтып, экономикалық белсенділікті арттырады.
Жалпы, ауыл шаруашылығы техникасының жаңаруы – Тарбағатайдағы аграрлық сектордың тұрақты дамуына жасалып жатқан маңызды қадамдардың бірі. Аталған бағыттағы жұмыстар алдағы уақытта да жалғасады.
Бүгін Өскеменде Шығыс Қазақстан облысының педагогтеріне арналған дәстүрлі тамыз конференциясының аясында «Жасанды интеллектті педагогикаға интеграциялау: азаматтық пен кәсіби дағдыларды дамыту» тақырында 25 пәндік интерактивті алаң ұйымдастырылды. Аталған іс-шара өңірдегі білім беру жүйесіне заманауи, озық тәжірибелерді енгізуге және ұстаздар арасында кәсіби ынтымақтастықты нығайтуға серпін берді, деп хабарлайды Altainews.kz сайтының тілшісі.
Аймақтық пәндік интерактивтік алаңның бірінші бөлімінде педагогтердің үздіксіз кәсіби қалыптасу мен дамуында айрықша маңызға ие: «Ұстаз» платформасына негізделген жаңа аттестация жүйесі; Жастарды жұмысшы мамандықтарына ынталандырып, қызығушылықтарын арттыру мақсатында жергілікті кәсіпорындармен әлеуметтік әріптестік орнату; «Ата-ана - мектеп - адал ұрпақ» үштік одағының рөлі; оқушылардың білім сапасын арттыру жолдары; оқу үдерісін тиімді басқаруға мүмкіндік беретін цифрлық технологияны қолдану мәселелері пысықталды.
Шараның екінші бөлімі 25 пәндік секция отырысымен жалғасып, оған мектепке дейінгі және жалпы орта, арнайы, инклюзивті, қосымша білім беру ұйымдарының педагогтері, әдіскерлер, педагог-кәсіби бағдар берушілер, психолог мамандар, кітапханашылар мен мектеп басшыларынан құралған 1200-ге жуық маман қатысты. Жиын барысында тәжірибелі педагогтер өз тәжірибелерімен бөлісіп, «2025-2026 оқу жылында Қазақстан Республикасының жалпы білім беретін мектептерінде білім беру үрдісін ұйымдастырудың ерекшеліктері туралы» әдістемелік нұсқаулық хаттың мазмұны талқыланды. Сонымен қатар, жаңа оқу жылына арналған өзекті міндеттер айқындалып, бірлескен іс-қимылдың негізгі бағыттары белгіленді.
Алқалы кеңес педагогтердің кәсіби дамуына тың серпін беріп, сапалы білім беруді қамтамасыз етудегі ортақ жауапкершілік пен өзара ынтымақтастықты нығайтты.
Жалпы, өңір ұстаздары үшін кәсіби дамудың маңызды алаңына айналып, жаңа оқу жылындағы басым бағыттар мен міндеттерді айқындап берген дәстүрлі тамыз конференциясының аясында өткен бүгінгі жиын білім беру саласында жаңашыл ойлау, үздіксіз даму және ортақ мақсат жолында бірігудің нақты көрінісі болды.
Алдағы оқу жылында білім беру сапасын арттыру, оқушы мен мұғалімге қолайлы орта қалыптастыру, цифрлық білім беру ресурстарын тиімді пайдалану сынды басым бағыттар өңір педагогтерінің күн тәртібіне енгізілмек. Бұл – өскелең ұрпақтың сапалы білім алып, бәсекеге қабілетті тұлға болып қалыптасуы жолындағы маңызды қадам.
