Шығыс Қазақстандағы Oskemen Hub биыл өңірлік шеңберден шығып, халықаралық IT-қауымдастықпен тығыз байланыс орнатқан инновациялық орталыққа айналды. Хабтың бастамалары жас мамандарды қолдау, стартаптар құру, заманауи технологияларды меңгерту және жаңа серіктестіктер қалыптастыру бағытында айтарлықтай нәтижелер көрсетті. Жыл бойы атқарылған жұмыстар аймақтың цифрлық секторының өсу қарқынын анық көрсетіп, өңірдің IT-картасында жаңа белес қалыптастырды.

Хаб жетекшісі Дидар Мұратұлының айтуынша, биылғы жылы орталық IT-білім сапасын күшейтуге, жас мамандарды даярлауға және стартап-экожүйені нығайтуға басымдық берген. Осы мақсатта 95-тен астам іс-шара өткізіліп, аймақтың мыңдаған жастары цифрлық саланың жаңа бағыттарымен танысты.

Oskemen Hub ұйымдастырған хакатондар мен интенсивтер аймақтық IT-қозғалыстың негізгі қозғаушы күшіне айналды. Decentrathon, CodeMasters, Solana Hackathon сияқты кең көлемді жарыстар өңір жастарының қызығушылығын арттырып, бәсекеге қабілетті мамандардың көбеюіне жол ашты. Стартаптарға қолдау көрсету платформалары – Startup Orda мен Startup Garage – елуге жуық жобаның нарыққа шығуына мүмкіндік берді. Жас кәсіпкерлерге тәулік бойы қолжетімді коуоркинг, менторлар, өнім әзірлеуге арналған бағдарламалар ұсынылды.

Хаб тәжірибелік білімге басымдық бере отырып, NoCode Bootcamp, AI Bootcamp, сондай-ақ бизнес-модельдеу тренингтерін өткізді. Pitch Day, Pizza Pitch және Flowers Pitch форматтары жас стартаперлерге өз жобаларын таныстырып, инвесторлармен байланыс орнатуға жағдай жасады. Beeline, T-Bank, Kolesa Group, X Academy сынды ірі компаниялардың мамандары өңір жастары үшін арнайы сабақтар өткізіп, тәжірибелерімен бөлісті.

Хабтың республикалық және халықаралық кеңістікте белсенді жұмыс істеуі де биылғы жылдың маңызды нәтижесіне айналды. Decentrathon 4.0 және Solana Hackathon бір уақытта 19 қалада өтіп, өңіраралық IT-байланыстарды күшейтті. Astana Hub-пен бірлескен бағдарламалар арқылы жүздеген қатысушы кәсіби курстардан өтті. Эстония елшісінің ресми сапары халықаралық әріптестікті нығайтып, Oskemen Hub-тың Еуропамен байланысын кеңейтті.

Орталықтың мектептер мен жоғары оқу орындарындағы жүйелі жұмысы да елеулі нәтиже берді: 30-дан астам іс-шара өткізіліп, мыңнан астам оқушы мен студент цифрлық салаға тартылды. «Простор» лагеріндегі Bootcamp, Coding Skills олимпиадасы, Solana және Decentrathon хакатондары жаңа буын IT-мамандарының қалыптасуына серпін берді.

Алдағы жылы Oskemen Hub қызмет ауқымын одан әрі кеңейтуді жоспарлап отыр. Дидар Мұратұлының айтуынша, AI бағытындағы бағдарламалар күшейтіледі, жыл сайынғы AI WEEK тұрақты форматқа енгізіледі. Startup Orda мен Startup Garage бағдарламаларының жаңа легі іске қосылып, облыстың аудан орталықтарында да хакатондар мен техникалық воркшоптар өткізу жоспарға енгізілген. Сондай-ақ мемлекеттік органдарға арналған GovTech бағытындағы оқыту бағдарламалары жалғасады.

Халықаралық IT-компаниялармен жаңа жобаларды жүзеге асыру арқылы өңірдің цифрлық даму қарқыны артпақ. Oskemen Hub биылғы жұмысымен Шығыс Қазақстан жастарына жаңа мүмкіндіктер ұсынып қана қоймай, өңірдің инновациялық экожүйесін қалыптастыруға нақты үлес қосты.