2025 жылдың 18-29 тамызы аралығында Oskemen Hub алаңында Appetite компаниясының қолдауымен CodeMasters Hackathon 3.0 байқауы өтті. Шара аясында қатысушылар жергілікті гастро-бизнес өкіліне арналған мобильді қосымша жасаумен айналысты. Хакатонның жалпы жүлде қоры — 500 000 теңге.

Іс-шараның басты мақсаты — жергілікті кәсіпкерлікті IT шешімдер арқылы қолдау, өңірлік жас мамандар қауымдастығын дамыту және стартап мәдениетін насихаттау болды.

Байқауға әртүрлі оқу орындары мен IT қауымдастықтарынан 17 команда қатысты. Іріктеу кезеңінің нәтижесінде ең мықты 6 команда финалға өтті. Олар 12 күн ішінде идеядан бастап дайын прототипке дейінгі толыққанды цифрлық өнім жасаумен айналысты.

CodeMasters Hackathon 3.0 жеңімпазы — Vertex командасы атанды. Команда құрамында Облыстық мамандандырылған мектеп-лицейінің оқушылары: Крамер Роман, Сайлаухан Айдос және Анохина Елизавета бар. Қазылар алқасы олардың жобасын ең инновациялық, техникалық тұрғыдан сауатты әрі нақты бизнеске тиімді шешім ретінде таныды.

Ұйымдастырушылар осындай бастамалар Шығыс Қазақстандағы технологиялық экожүйені дамытуға үлес қосып, болашақ IT көшбасшыларының жолын ашатынына сенім білдірді.