Шемонаиха ауданында өрт қауіпсіздігін күшейту бағытында ауқымды жұмыс жүргізіліп жатыр. Қазіргі уақытта ауданда үш мемлекеттік өртке қарсы бөлімше және жеті өрт сөндіру бекеті қызмет етеді. Биыл олардың қатары екі нысанмен толықты: Камышинка және Октябрьское ауылдарында жаңа өрт сөндіру бекеттері ашылып, жергілікті тұрғындардың қауіпсіздігі үшін маңызды инфрақұрылымдық қолдау жасалды. Бұл жұмыстар аудан әкімдігі мен жергілікті шаруашылықтардың бастамасымен жүзеге асып, ҚР Төтенше жағдайлар министрлігі тарапынан қажетті арнайы техника бөлінді.

Шығыс Қазақстан облысының әкімі Нұрымбет Сақтағанов Төтенше жағдайлар министрлігінің «Ауыл құтқарушылары» жобасы аясында Вавилон ауылдық округіне қарасты Сугатовка ауылындағы өрт сөндіру бекетінің дайындығын тексерді. Бағдарлама ауылдық аумақтардағы төтенше жағдайларға әрекет ету уақытын қысқартып, өрт қауіпсіздігін айтарлықтай жақсартуды көздейді.

Жаңа бекеттің ресми ашылуы алдағы күндері облыс әкімі мен ТЖ министрінің қатысуымен өтпек. Бұл нысан іске қосылғаннан кейін өртке қарсы шараларды ұйымдастыру жылдамдығы бірнеше есе артады. Бұрын шалғай ауылдарға өрт сөндіру техникасының жетуі аудан орталығынан ұзақ уақыт алатын. Енді ауылдың өзінде арнайы техника дайын тұрады, жергілікті тұрғындар мен шаруашылық қызметкерлері жедел жұмылдырылады.

Өрт сөндіру бекеті барлық қажетті жабдықтармен жабдықталған. Техника Шемонаиха қаласындағы ӨБ-28 бөлімінен бөлініп, қазіргі таңда КАМАЗ АЦ-8-40-7 (4318) арнайы көлігімен қамтамасыз етілген. Бұл туралы облыс басшысына ШҚО ТЖД бастығы, полковник Рашид Блялов баяндады.

Нұрымбет Сақтағановтың айтуынша, ауылдарда мұндай бекеттердің ашылуы стратегиялық маңызға ие:
– Бұрын қаладан немесе аудан орталығынан өрт сөндіру бригадасының жетуі біраз уақыт алатын. Ал ауылдың ішінде техника мен адамдар дайын тұрса, үлкен өрттердің алдын тез алуға болады. Бұл әсіресе орман алқабы, шабындық пен өндірістік нысандар орналасқан ауылдар үшін аса маңызды. Биыл осындай бес бекет ашылады, келесі жылы тағы отыз бекет салу жоспарланған. Жергілікті әкімдік пен шаруашылық жетекшілері жабдықтар мен ғимараттарға жауапты болса, техниканы министрлік қамтамасыз етеді, – деді облыс әкімі.

Жаңадан ашылған Сугатовка бекеті тек осы ауылдың ғана емес, маңайдағы Горкуново (83 адам) және Кенюхово (244 адам) ауылдарының да қауіпсіздігін күшейтеді. Барлығы 800-ге жуық тұрғын төтенше жағдай кезінде жедел көмекке жүгінуге мүмкіндік алады. Тұрғын үйлер, шаруашылық нысандары, әлеуметтік инфрақұрылым объектілері үшін қауіп деңгейі айтарлықтай төмендейді.

Аудандағы «Заря» шаруа қожалығы да әлеуметтік инфрақұрылымды дамытуға белсенді үлес қосып келеді. Өрт сөндіру бекетін салуға қолдау көрсеткен шаруашылық басшылығы ауыл халқының қауіпсіздігі мен тұрмыс сапасын жақсартуға бағытталған бастамаға өз үлесін қосты.

Шемонаиха ауданында өрт қауіпсіздігі жүйесін жаңарту жалғасады. Жергілікті билік, шаруашылықтар және ТЖМ арасындағы серіктестік нәтижесінде ауылдық аумақтарда жедел әрекет ету қабілеті күшейіп, өңір тұрғындарының қауіпсіздігі жаңа деңгейге көтерілмек.