Қытай Халық Республикасының төрағасы Си Цзиньпин ресми сапармен Астанаға келді. Бұл сапар «Орталық Азия – Қытай» саммиті аясында өтіп жатыр. Елордада Қасым-Жомарт Тоқаев пен Қытай басшысы жоғары деңгейде келіссөздер жүргізді, деп хабарлайды Altainews.kz тілшісі Ақордаға сілтеме жасап.

Айта кетейік, бұл кездесу Қытай көшбасшысының туған күнімен тұспа-тұс келіп отыр. Бұл өз кезегінде Қазақстан мен Қытай арасындағы достық пен өзара құрметтің белгісіне айналды.

Президент Қасым-Жомарт Тоқаев Қытайды Қазақстанның жақын көршісі әрі сенімді серіктесі ретінде атап өтті.

Мемлекет басшысы екіжақты қарым-қатынас жылдан жылға нығайып, жаңа «алтын кезеңге» қадам басқанын мәлімдеді. Достық байланыс екі елдің тұрақты әлеуметтік-экономикалық дамуына және халықтардың әл-ауқатын жақсартуға зор септігін тигізіп жатқанына назар аударды. 

Өз кезегінде Си Цзиньпин қазақ жерінде көрсетілген сый-құрмет үшін Президентке ризашылығын білдірді

Кездесудің қорытындысында екі ел арасында 24 түрлі келісімге қол қойылды. Бұл құжаттар энергетика, ғарыш, цифрландыру, ауыл шаруашылығы, туризм, медицина, зияткерлік меншік құқығын қорғау, кеден және ғылым салаларын қамтиды.

Сондай-ақ екіжақты инвестицияны қорғау және техникалық әріптестік туралы келісімдер жасалды.

Айрықша мән берілген тақырыптардың бірі – атом энергетикасы. Қазақстан алдағы уақытта 2-3 атом электр станциясын салуды жоспарлап отыр. Президент  бұл жобада Қытайдың CNNC компаниясын сенімді серіктес ретінде қарайтынын атап өтті.

Келіссөз барысында мәдени-гуманитарлық ынтымақтастық та назардан тыс қалмады. Қытайдың мәдени орталықтары, Лу Бань шеберханалары, қытайлық университеттердің филиалдары мен бірлескен ғылыми-зерттеу орталықтары ашылмақ.

Еске салайық, 2023 жылы Президент Тоқаевтың бастамасымен Өскемендегі Д. Серікбаев атындағы техникалық университетте «Лу Бань шеберханасы» ашылған болатын. Бұл орталық — Қазақстан мен Қытай арасындағы білім мен технология саласындағы ынтымақтастықтың нақты көрінісі.

Жалпы алғанда, Қытай басшысының бұл сапары – екі ел арасындағы қарым-қатынастың жаңа кезеңге шыққанын айғақтайды. Бұл байланыс саяси диалогқа, экономикалық әріптестікке және өзара құрметке негізделіп отыр.

Айтпақшы, 2025 жыл Қазақстанда Қытай туризмінің жылы болып жарияланды. Бұл да елдер арасындағы мәдени және халықтық байланыстарды нығайтудың бір жолы болмақ.

Андрей Дудник

Фото: Ақорда