Күршім ауданында орналасқан «Төре Тоғам» ЖШС бүгінде аймақтағы ең ірі балық өңдеу кәсіпорындарының біріне айналып отыр. Қалдықсыз өндіріс принципімен жұмыс істейтін зауыт өнімдерін ішкі нарықпен қатар, алыс-жақын шет елдерге – Еуропа, Қытай және Ресейге экспорттауда, деп хабарлайды Altainews.kz.

Кәсіпорын директорының орынбасары Азамат Бейсебаевтың айтуынша, қазіргі уақытта бұрыннан жұмыс істеп келе жатқан цехта тәулігіне 10 тоннаға дейін балық өңделеді. Алайда, кәсіпорын бұл көрсеткішпен тоқтап қалмақ емес – қазір жаңа өндірістік цехтың құрылысы жүріп жатыр.

Зауытқа шикізат Зайсан көлі мен Бұқтырма су қоймасынан ауланатын балық арқылы жеткізіледі. Кәсіпорынға 600-ден 800-ге дейін жергілікті балықшы балық әкеліп отырады. Бұл аудан халқына тұрақты табыс көзі болып отыр.

Өндірілген өнімнің бір бөлігі Өскемен, Астана қалаларында сатылса, 15-20 тоннасы шетелге экспортталады. Кәсіпорын толықтай қалдықсыз технологияға негізделгендіктен, экологияға да зиян келтірмейді.

Фото: Екатерина Семина