Радиофобиямен күрес: ШҚО-дағы байланыс станцияларының электромагниттік өрісі өлшеніп тұрады
Шығыс Қазақстан
11-06-2025, 18:52
Өңірде 100-ден астам түрлі нүктеде 600-ге жуық өлшеу жүргізілді. Мониторинг нәтижелері бойынша мамандар зерттелген көрсеткіштердің шекті рұқсат етілген деңгейден асып кетуін анықтаған жоқ, деп хабарлайды Altainews.kz тілшісі.
– Қазақстан Республикасында байланыс объектілерін орналастыру және пайдалану үшін әлемдегі ең қатаң санитарлық-эпидемиологиялық талаптардың бірі қолданылады. Мысалы, еліміздегі базалық станциялар бойынша нормалар Скандинавия немесе АҚШ-қа қарағанда 10 есе қатаң, – деп мәлімдеді ШҚО Санитарлық-эпидемиологиялық бақылау департаменті.
Ведомство облыс орталығында 5G технологиясын енгізуге байланысты 2025 жылға 1420 зерттеу жоспарланғанын қосты.
Зерттеулер электр (магниттік) өрісінің кернеуін және радио-техникалық объектілерден таралатын энергия ағынының тығыздығын өлшеу арқылы жүргізіледі.
– Ұялы байланыстың базалық станцияларынан шығатын электромагниттік өрістер деңгейіне санитарлық-эпидемиологиялық мониторинг жүргізу елді мекендер тұрғындарының әлеуметтік шиеленісін төмендетуге мүмкіндік береді, – деп толықтырды СЭБД.
Ағымдағы жылдың 9 маусымындағы жағдай бойынша мамандар 150 нүктеде 600 өлшеу жүргізген. Шекті рұқсат етілген деңгейден асып кету тіркелген жоқ.
– Радиофобия – қазіргі қоғамның күрделі мәселесі, бірақ ғылыми зерттеулерге сүйене отырып, базалық станциялардың, оның ішінде бесінші буын желілері мұнараларының қауіпсіз екенін мәлімдеуге болады, – дейді департамент мамандары.
Елизавета Седых
