Катонқарағай ауданында облыстағы ең үлкен жаңа ипподром бой көтерді. Бұл арена халықаралық “Алтай – түркі әлемінің алтын бесігі” фестиваліне орай арнайы салынған. Жаңа нысан – тек ат жарысы өтетін орын ғана емес, жергілікті халықтың бірігіп істеген жұмысының көрінісі.

Бұрын бұл жерде ескі, ескерусіз қалған ипподром болған. Сол алаң бүгінде жаңарып, заманауи талаптарға сай, 1000 адам сиятын үлкен аренаға айналды. Жобаны жүзеге асыруға ауданнан төрт кәсіпкер жұмыла кірісіп, әрқайсысы 10 миллион теңгеден қаржы салған. Оларға облыстағы ірі кәсіпорындар да қолдау білдіріп, демеу көрсетті.

Құрылыс жұмыстарына тек мердігерлер ғана емес, ауыл тұрғындары, аудан мекемелерінің қызметкерлері де атсалысты. Ауылдардан адамдар сенбіліктерге шығып, аумақты ретке келтіріп, айналаны абаттандыруға көмектесті. Екі құрылыс бригадасы күні-түні жұмыс істеп, ипподромды қысқа уақытта аяқтап шықты.

Арена – Дүниежүзілік көшпенділер ойындарында қолданылатын үлгілерге сай салынған. Енді бұл жерде бәйге де, ұлттық ойындар да, түрлі мәдени шаралар да ұйымдастырылатын болады.

Катонқарағайдағы жаңа ипподром – тек спорт нысаны ғана емес, елдің ынтымағы мен ұйымшылдығының нақты дәлелі.

Фото: pexels.com