Табиғи ошақты инфекциялардың алдын алу мақсатында елімізде жыл сайын республикалық бюджет есебінен өңдеу жұмыстары жүргізіледі, деп хабарлайды Altainews.kz тілшісі.

ШҚО санитариялық-эпидемиологиялық бақылау департаментінің басшысы Қанат Тұрдиевтің айтуынша, табиғи ошақты аурулар – кене энцефалиті, Лайм боррелиозы, туляремия, безгек секілді сырқаттардың алдын алу және тұрақтандыру үшін эндемиялық аумақтарда жыл сайын арнайы өңдеу шаралары қолға алынады.

Эндемиялық аумақтар қатарына Өскемен, Риддер қалалары, Алтай мен Үлкен Нарын өңірлері, сондай-ақ Глубокое, Самар, Зайсан, Ұлан, Катонқарағай және Шемонаиха аудандары кіреді.

Эндемиялық аумақтардың негізгі белгілері – инфекцияның табиғи ошағының болуы және кенелердің белсенді шабуылының жоғары деңгейі.

Биыл безгек ауруының тасымалдаушылары тіркелетін су айдындарында үш мәрте өңдеу жүргізіледі. Бұл жұмыстар Глубокое, Зайсан, Ұлан аудандары мен Өскемен қаласын қамтиды.

Өңдеу энтомологиялық көрсеткіштерге – яғни аралық даму сатысындағы дернәсілдердің болуына қарай жүргізіледі. Биыл бірінші тур аяқталған.

Ал таяз су айдындары мен елді мекендердің ашық аумақтарындағы ұсақ жәндіктер (масалар, шіркейлер және т.б.) дернәсілдеріне қарсы күресті жергілікті атқарушы органдар жүргізуде.

Фото: depositphotos.com