Жұмыс сапары аясында Шығыс Қазақстан облысының әкімі Нұрымбет Сақтағанов Зайсан ауданының халқымен ашық форматта кездесу өткізді. Жиында Мемлекет басшысының тапсырмаларын орындау және әлеуметтік-экономикалық реформаларды іске асыру шеңберінде экономиканың өсімі мен әртараптандырылуын қамтамасыз ету, инфрақұрылымды дамыту және өзекті әлеуметтік мәселелерді шешу жайы талқыланды.

Кездесу барысында Зайсан ауданының агроөнеркәсіптік кешені мен өнеркәсібін дамытуға әлеуеті бар екені, сондай-ақ мұндағы экономикалық және адами капиталдың маңызы атап өтілді.
Биыл аудан бойынша бірқатар жаңа өндіріс орындарын ашу көзделген. Атап айтқанда, Дайыр ауылында минералды және алкогольсіз сусын шығаратын цех («ARNNA MINERALS» ЖШС) іске қосылады. Сонымен қатар Зайсан қаласында ет өңдеу зауыты («Шығыс АС» ЖШС), қызыл кірпіш шығаратын зауыт («Саялым» ЖШС) салынып, көкөніс пен жеміс-жидекті қайта өңдейтін цех (ЖК «Ринат») іске қосылады деп күтілуде.

Бұдан бөлек, Айнабұлақ ауылында кемпинг (ЖК Пушпаков Е.) салу және Қарабұлақ ауылында балық өңдеу зауытын («Zaisan-Balyq» ЖШС) қалпына келтіру көзделіп отыр.

Облыс әкімі аудан басшысына даму жоспары аясындағы барлық жобаларды сапалы әрі мерзімінде орындауды, сондай-ақ кіріс көздерін ұлғайту және салық базасын кеңейту бағытында жұмыстарды күшейтуді тапсырды.

ШҚО әкімінің баспасөз қызметі