Өскемен қаласында ұлттық рухты дәріптейтін жаңа мурал бой көтеріп жатыр. Көпшілік бұл көркем туындыны жақын күндері Ауэзов даңғылы, 16 мекенжайынан тамашалай алады, деп хабарлайды Altainews.kz тілшісі.

Муралда қазақ халқының табиғи және рухани байлығын бейнелейтін көріністер айшықталған. Кескіндемеде кең байтақ дала, нәзік қызғалдақтар, сондай-ақ ұлттық киімдегі қазақ қызының бейнесі көрініс тапқан. Бұл образдар – халқымыздың болмысын, табиғатқа деген сүйіспеншілігін және ұлттық мәдениетке деген құрметін көркем жеткізудің символы.

Жоба Өскемен қаласы әкімдігінің қолдауымен жүзеге асырылуда. Ұлттық нақыштағы осындай арт-нысандар қалалық кеңістікті көркейтіп қана қоймай, жастарды өнерге баулуға, ұлттық құндылықтарды дәріптеуге мүмкіндік береді.

Муралды салу жұмыстары бірнеше күн ішінде аяқталады деп күтілуде.