1 мамыр – Қазақстан халқының бірлігі күніне орай Өскеменде қазақ музыка өнерінің символына айналған аңыз топ туралы түсірілген «Дос-Мұқасан» фильмі көрсетілді. ШҚО Мәдениет басқармасының ұйымдастыруымен өткен рухани кешке қала тұрғындары мен қонақтары көптеп жиналды, деп хабарлайды Altainews.kz тілшісі.

«Дос-Мұқасан» фильмі – 1967 жылы құрылған, қазақ эстрадасына жаңа леп әкелген ансамбльдің тарихына арналған көркем туынды. Досым Сүлеев, Мұрат Құсайынов, Хамит Санбаев пен Александр Литвинов секілді өнерпаздардың құрған тобы заманына сай жаңашыл бағыттағы әндерімен халықтың жүрегінен орын тапқан.

Фильмнің көрсетіліміне қатысқан аға буын өкілдері мен жастар зор ықылас білдіріп, туындының тәрбиелік, рухани мәнін ерекше атап өтті.

Көрсетілімнің басты мақсаты – ұлттық музыкалық мұрамызды ұлықтау, жас ұрпаққа қазақ өнерінің дара жолын таныту. Осы орайда, игі бастама бірлік пен мәдениет мерекесін ұштастыра отырып, ел рухын асқақтатты.