Жартастар естелік қалдыратын жер емес: ұлттық парк граффити салмауды өтінді
Катонқарағай мемлекеттік ұлттық паркінің өкілдері туристер мен тұрғындарды табиғи мұраға ұқыпты қарауға шақырды. Себебі соңғы жылдары кейбір жартастар мен тастарға аэрозоль бояумен жазылған жазулар көбейіп барады, деп хабарлайды Altainews.kz тілшісі.
Аршаты ауылы маңындағы Өрел ауылдық округінде орналасқан бір жартасқа «Дембель тасы» деген бейресми атау берілген. Бұл жерде әскерден оралған сарбаздар аты-жөндерін жазып қалдыруды әдетке айналдырған.
Осындай тағы бір зақымдалған жартас республикалық маңызы бар жол бойында орналасқан. Бұл жол Рахман қайнарына апарады. Мұнда да туристер түрлі жазулар мен суреттер қалдырып кеткен.
Табиғаттың өзі жасаған сұлулықты ешбір сурет көркейте алмайды, – делінген ұлттық парктің мәлімдемесінде.
Экологтар мен табиғат қорғаушылары осындай жайттар қайталанбауы үшін жұртшылықты жауапкершілікке шақырады.
Елизавета Седых
Фото: Катонқарағай мемлекеттік ұлттық паркі
