Глубокое ауданы әлеуметтік даму саласында тың серпін алуда. Шығыс Қазақстан облысының әкімі Нұрымбет Сақтағановтың аудан халқымен жүздесуінде білім беру, денсаулық сақтау, интернетпен қамту және тұрғын үймен қамтамасыз ету бағыттарындағы өзекті мәселелер қозғалып, нақты шешімдер ұсынылды.

Өңір басшысы әр салаға қатысты кешенді жобалардың әзірленіп, жүзеге аса бастағанын айтты. Аудан тұрғындарының басым бөлігі интернет желісіне қосылғанымен, кейбір елді мекендерде байланыс сапасы әлі де төмен.

Ауылішілік жол бойларына антенна-мачталар орнату бастамасы — шалғай елді мекендердің цифрлық теңдігін қамтамасыз ету жолындағы маңызды қадам.

Әлеуметтік тұрғыдан әлсіз топтарға арналған тұрғын үй мәселесі де назарда. Былтыр ауданда көпбалалы және аз қамтылған отбасылар үшін «Бірқабатты Шығыс» бағдарламасы шеңберінде ауылдық елді мекендерден 48 үй мен 26 пәтер сатып алынды. Биыл бұл көрсеткішті арттыру көзделген: қосымша 24 үй мен 29 пәтер иелеріне табысталмақ.

Былтыр Белоусовка кентінде 300 орындық жаңа мектеп пайдалануға берілді. Қазір Опытное Поле ауылында тағы бір мектептің құрылысы жалғасуда. Сонымен қатар, 7 білім беру мекемесінде жөндеу жұмыстары аяқталды, екі мектептің шатыры ауыстырылды. Үш пәндік кабинет сатып алуға 38 млн теңге бөлінді.

Прапорщиково ауылында мектеп салу мәселесі де күн тәртібінде тұр. Аталған жоба республикалық бюджет есебінен қаржыланбақ.

Аудан бойынша медицина саласына қажеттілік сақталып отыр: 4 дәрігер жетіспейді. Соған қарамастан, бірқатар көрсеткіштерде оң өзгеріс байқалады.

Сонымен қатар, тұрғындар аурухананың есіктері тым жоғары орналасқандықтан, егде жастағы азаматтарға ыңғайсыз екенін айтты. Бұл жайт жөндеу жұмыстары кезінде міндетті түрде ескерілмек.

Интернет сапасы, мектеп құрылысы, аурухана жөндеуі мен әлеуметтік тұрғын үй мәселесі — барлығы Глубокое ауданында халықтың өмір сүру сапасын арттыру мақсатындағы нақты бастамалармен шешім табуда. Облыс әкімі барлық жобалардың сапалы әрі уақтылы аяқталуын талап етіп, салалық басқармаларға нақты тапсырмалар жүктеді.

Өңір басшысының айтуынша, «тұрғындардың тұрмыстық жайлылығы — әкімдік жұмысының басты өлшемі».