Шығыс Қазақстан облысының Глубокое ауданында республикалық ауқымдағы «Шығыстағы Дала күні» өтті. Іс-шара «Шығыс Қазақстан ауыл шаруашылығы тәжірибе станциясы» ЖШС базасында ұйымдастырылып, шаруаларды, агроөнеркәсіп мамандарын, ғылым мен бизнес құрылымдары өкілдерін бір алаңға тоғыстырды. 

Мақсат – ауыл шаруашылығы дақылдарын тиімді өсіру бойынша аграршылардың кәсіби білімі мен практикалық дағдыларын арттыру.

Дала күнінің басты тақырыптары – заманауи тұқым шаруашылығы әдістері, өсімдіктерді қорғау, ресурсты үнемдеу технологиялары, АӨК-ті мемлекеттік қолдау бағдарламалары болды.

Университет бірнеше жылдан бері тәжірибе станциясымен тығыз жұмыс істейді. Бұл жолы оқу орны топырақтың ылғалдылық деңгейін болжауға бағытталған ғылыми жобаларын таныстырды.

Іс-шараға Қазақстанның әр өңірінен және шетелден келген қонақтар қатысты.

Ресми ашылудан кейін қатысушылар жаңа сорттар мен гибридтердің демонстрациялық егістіктерімен танысты. Мұнда күздік және жаздық дақылдардың, дәнді, бұршақ тұқымдас, майлы және малазықтық отандық сұрыптары көрсетілді.

Одан кейін ауыл шаруашылығы техникаларының көрсетілімі өтті.

Қатысушылар тек техниканың жұмысын көзбен көріп қоймай, мамандарға сұрақ қойып, практикалық кеңестер де алды.

Іс-шараға ҚР Ауыл шаруашылығы вице-министрі Ермек Кенжеханұлы қатысты.

Оның айтуынша, ғылыми жұмыс жүргізу аз, оны аграршыларға қолжетімді етіп жеткізу де – басты міндет.
Кейін тәжірибе станциясының алаңында отандық және шетелдік сарапшылардың қатысуымен пленарлық отырыс өтті.