27 маусым күні Өскемендегі Спорт сарайында өңірдің түкпір-түкпірінен келген кәсіпкерлер бас қосады. Бұл күні мұнда «Бір ауыл – бір өнім» атты көрме-жәрмеңке өтеді. Шарада ауыл кәсіпкерлері өздері табиғи өнімдерден қолмен жасап шығарған ерекше бұйымдарын жұрт назарына ұсынады, деп хабарлайды  Altainews.kz тілшісі.

Көрмеде қойылатын тауарлардың бәрі жергілікті шикізаттан жасалған. Бұл дегеніміз — экологиялық таза, сапалы әрі қолөнер мен ұлттық нақышты ұштастырған өнімдер болмақ.

«Бір ауыл – бір өнім» жобасы алғаш рет Жапонияда басталып, көп елде қолдау тапқан бастама. Қазақстанда бұл бағдарлама 2021 жылдан бері жүзеге асып келеді. Жобаның басты мақсаты — ауыл кәсіпкерлеріне дем беру, олардың өнімін танымал етіп, кәсібін алға жылжытуға мүмкіндік беру.

Биыл бұл жобаға 55 кәсіпкер өтінім берген. Әсіресе Күршім, Катонқарағай, Ұлан, Алтай аудандары мен Риддер қаласынан қатысуға ниеттілер көп. Көрменің соңында үздік кәсіпкерлер таңдалып, республикалық деңгейдегі жобаға қатысу мүмкіндігіне ие болады. Ал финалға өткендер өз кәсібін дамыту үшін арнайы оқудан өтіп, қайтарымсыз грант ұтып ала алады.

Айтпақшы, былтыр дәл осы жобада облыстың үш кәсіпкері жеңімпаз атанып, 5 миллион теңгеден мемлекеттік грант алған болатын. Солардың бірі — бал өнімдерін өндіруші Ольга Ершова мен шыны бұйымдарын жасайтын шебер Людмила Евженкова.