Осы жылдың соңына дейін еліміздегі 134 гидротехникалық құрылыс көпфакторлы тексеруден өтеді. Жалпы алғанда, 2028 жылдың соңына дейін осындай 557 нысанда кешенді тексеріс жүргізілмек, деп хабарлайды Altainews.kz тілшісі Су ресурстары және ирригация министрлігіне сілтеме жасап.

Министрліктің мәліметінше, көпфакторлы тексеріс нысанның және ондағы жабдықтардың техникалық жағдайын, сондай-ақ қажет болатын жөндеу жұмыстарының көлемі мен түрлерін анықтауға мүмкіндік береді. Бұл тәсіл гидротехникалық құрылыстардың қауіпсіздігі мен ұзақмерзімді пайдаланылуын қамтамасыз ету мақсатында қолға алынған.
Вице-министр Ерболат Ибрайхановтың айтуынша, жаңа Су кодексіне сәйкес гидротехникалық нысандардың иелері әр бес жыл сайын өздеріне тиесілі құрылыстарға көпфакторлы тексеріс жүргізуге міндетті.

Министрліктің дерегінше, былтыр елдің 14 облысындағы 84 нысанда көпфакторлы тексеру жұмыстары жүргізілген. Бұл бастапқы жоспарланған көрсеткіштен артық орындалып, гидротехникалық құрылыстардың жағдайын жақсартуға септігін тигізді.
Осы жылдың соңына дейінгі тексеріс жұмыстары еліміздің су қауіпсіздігін нығайтып, гидротехникалық нысандардың беріктігі мен тиімділігін арттыруға бағытталған. Су ресурстарын ұтымды пайдалану және қауіпсіздігін қамтамасыз ету министрлік тарапынан алдағы уақытта да басты назарда болмақ.