Риддерліктер «Матрёнин Соколок» тауының етегінде орын теуіп, қылқан жапырақты ағаштармен көмкерілген жерде серуендегенді ерекше ұнатады. Осыны ескере келе, бұрынғы саябақ көлемін кеңейтіп, демалыс аймағын жаңарту жобасы әзірленген болатын. Осыған демеушілік жасаған кәсіпкер есебінен жаңғырту жұмыстары жүргізіліп, «Айгерім» саябағы салтанатты түрде ашылды, деп хабарлайды Altainews.kz сайтының тілшісі.

Салтанатты жиынға жергілікті атқарушы билік өкілдері, мәслихат депутаттары, қоғам белсенділері мен қала тұрғындары қатысты.

Осыдан біраз уақыт бұрын жеке кәсіпкер Наталья Загидуллина «Айгерім» саябағын сенімгерлік басқаруға алған болатын. Қала әкімдігімен жасасқан келісімшарт негізінде ендігәрі ол аталған демалыс орнын күтіп-баптауға жауапты. Кәсіпкердің айтуынша, бұл күнде шамамен 10 000 шаршы метрден асатын аумаққа абаттандыру жұмыстары жүргізілді. Осылайша саябақ түрленіп, жаңа кейіпке енген.

Осы қалада он үш жылдан астам уақыт бойы тұрып келе жатқан Жадыра Қайсанова отбасымен демалып, серуендеуге арналған осындай орындар қала ішінде ғана емес, шеткері аумақтарда да көптеп ашылса екен дейді. Сонымен қатар, саябаққа келушілер мұндағы жасыл желекті көздің қарашығындай сақтап, гүл өсіретін алаңдарды көбейтумен қоса, қоғамдық дәретханалар жасап беруді сұрап отыр.

Кеншілер қаласындағы «Айгерім» саябағының ашылу салтанаты ары қарай мерекелік концертке ұласты. Жергілікті өнерпаздар ән мен биден шашу шашып, көпшіліктің көңілін көтерді.

Фото/видео: Жалғас Сақадиев