Қазақстан халқы Ассамблеясының Шығыс Қазақстан облыстық XXXI сессиясы Өскемендегі Республика алаңында, арнайы тігілген киіз үйде өтті. Түрлі этнос өкілдерін бір шаңырақ астына жиған бұл жиын – ел бірлігінің, қоғамдық келісім мен татулықтың айқын көрінісіне айналды, деп хабарлайды Altainews.kz тілшісі.

Жиынға ҚХА мүшелері, этномәдени бірлестіктер мен қоғамдық ұйымдардың өкілдері, сондай-ақ «Ассамблея жастары» қозғалысының белсенділері қатысты.

Биыл Қазақстан халқы Ассамблеясының құрылғанына 30 жыл толып отыр. Бұл – ел өміріндегі маңызды қоғамдық-саяси оқиға. Атаулы дата аясында ұйымдастырылған сессия – еліміздегі бірлік, бейбітшілік және өзара түсіністіктің нығая түскенін айқындайтын маңызды алаң болды.

Сессияда сөз сөйлеген Шығыс Қазақстан облысының әкімі Нұрымбет Сақтағанов жиынның маңыздылығына тоқталды.

Сессия барысында ҚХА-ның даму бағыттары, жастармен жұмыстың жаңа форматтары, қазақстандық бірегейлікті нығайту жолдары талқыланды. Әсіресе жас буынның этносаралық келісімді сақтау мен дамытудағы рөліне айрықша назар аударылды.

Жиын этномәдени бірлестіктердің озық тәжірибесін бөлісуге, қоғамдық келісім мен бірлікті нығайтуда күш-жігерді үйлестіруге бағытталған ашық диалог алаңына айналды. Іс-шара соңында өңірдің қоғамдық өміріне белсене араласып жүрген бірқатар азаматтар «Қазақстан халқы Ассамблеясына 30 жыл» мерейтойлық медалімен марапатталды.

Фото: Махаббат Ахметжанова