Шығыс Қазақстанда су айдындарында жазатайым оқиғалардың алдын алу мақсатында қауіпсіздік шаралары күшейтілді. Бұқтырма су қоймасы мен басқа да жаппай демалатын жерлерде ТЖД құтқарушылары, полиция және көліктік бақылау инспекциясы бірлесіп күнделікті рейдтер жүргізуде, деп хабарлайды Altainews.kz тілшісі ШҚО ТЖД баспасөз қызметіне сілтеме жасап.

Су маусымы басталғалы бері 460-қа жуық патруль ұйымдастырылып, демалушыларға суда қауіпсіздік сақтау ережелері түсіндірілді. Төтенше жағдайлар департаментінің мәліметінше, тек рейдтердің өзінде 6 адам құтқарылған.

Құтқарушылардың айтуынша, жиі кездесетін заң бұзушылықтардың бірі – құтқару кеудешелерінсіз жүзу құралдарын қолдану және шектеу қалтқыларынан асып жүзу. Бұл адам өміріне тікелей қауіп төндіреді.

Тексерулер барысында Әкімшілік құқық бұзушылық туралы кодекстің бірнеше бабы бойынша тәртіп бұзушылар анықталған. Атап айтқанда, 592-баптың 1-бөлімі, 412-бап және 364-19-баптар бойынша бірнеше адамға шара қолданылған.

ТЖД мамандары тұрғындарға келесі ережелерді ескеруді сұрайды:

Тек арнайы жабдықталған жағажайларда шомылыңыз;

Су қоймаларында спирттік ішімдік ішпеңіз;

Қайықпен, катамаранмен немесе скутермен жүргенде қауіпсіздік ережелерін сақтаңыз;

Міндетті түрде құтқару кеудешесін киіңіз;

Қайықтан суға сүңгуге болмайды;

16 жасқа дейінгі балалар ересектердің қарауынсыз жүзу құралдарын қолданбауға тиіс;

Жүзу құралдарын шамадан тыс жүктемеу қажет;

Қайыққа отыру, орын ауыстыру, бір қайықтан екіншісіне секіру – қауіпті және тыйым салынған.

Кез келген төтенше жағдай орын алғанда 112 нөміріне дереу хабарласыңыз.