Өскемен қаласында KAZ Minerals Half Marathon Oskemen атты ауқымды марафон өтті. Салауатты өмір салтын насихаттауға бағытталған бұл шараға 2000-нан астам қала тұрғыны мен қонағы белсене қатысты. Жарыс қаланың негізгі көшелері мен әсем жағалау аумағын қамтыды, деп хабарлайды  Altainews.kz тілшісі.

Қатысушылар үш түрлі қашықтық бойынша — 21,1 км, 10 км және 5 км — өз мүмкіндіктерін сынап көрді. Марафон аясында Шығыс Қазақстан облыстық Полиция департаменті «Есірткіге жол жоқ!» атты профилактикалық акция ұйымдастырды.

Есірткі қылмысына қарсы іс-қимыл басқармасының қызметкерлері қатысушылар мен көрермендерге арнайы ақпараттық парақшалар таратып, есірткіге қарсы ұрандар жазылған футболкалар мен бас киімдер сыйға тартты.

Сонымен қатар, Киберқылмысқа қарсы іс-қимыл басқармасының мамандары интернет-алаяқтыққа қатысты түсіндіру жұмыстарын жүргізіп, цифрлық қауіпсіздік ережелері туралы ақпарат берді. Олар интернеттегі алаяқтықтың кең таралған түрлеріне тоқталып, жеке деректерді қорғау бойынша кеңестер ұсынды.

Бес шақырымдық қашықтықта үздік нәтиже көрсеткендер марапатталды. Жеңімпаздарға Полиция департаменті атынан мақтау қағаздары мен ақшалай сыйлықтар табысталды.

Фото: ШҚО полиция департаментінің баспасөз қызметі