Алтайдың інжу-маржанының мерейтойы: Марқакөл қорығының 50 жылдығы халықаралық фестивальмен аталып өтті

Мерейтойлық шараға еліміздің әр өңірінен келген қонақтармен қатар шетелдік делегациялар, экологтар, ғалымдар, туризм саласының мамандары, қоғам қайраткерлері мен жергілікті тұрғындар қатысты. Фестиваль табиғатты қорғау, тарихи-мәдени мұраны дәріптеу және өңірдің туристік әлеуетін таныстыру бағытындағы маңызды алаңға айналды.

Жарты ғасыр бұрын құрылған Марқакөл мемлекеттік табиғи қорығы бүгінде Қазақстандағы ерекше қорғалатын табиғи аумақтардың бірі саналады. Қорықтың басты мақсаты – Марқакөл өңірінің бірегей экожүйесін, сирек кездесетін жануарлар мен өсімдіктер дүниесін, сондай-ақ табиғи ландшафтын келер ұрпаққа аман жеткізу. Мамандардың айтуынша, бұл аумақта Қызыл кітапқа енген көптеген жануарлар мекендейді, ал Марқакөл көлі өзінің мөлдір суымен және бай биоалуантүрлілігімен әлем ғалымдарының қызығушылығын тудырып келеді.

Фестиваль аясында ұлттық нақышта безендірілген этноауыл бой көтерді. Ақ шаңқан киіз үйлерде қонақтарға Марқакөл өлкесінің тарихы, табиғи ерекшеліктері, қорықтың ғылыми қызметі, экологиялық жобалары, инвестициялық мүмкіндіктері мен туристік әлеуеті жан-жақты таныстырылды. Сонымен қатар қолөнер шеберлерінің көрмелері ұйымдастырылып, ұлттық тағамдар ұсынылды, қазақ халқының салт-дәстүрлері мен мәдени мұрасы кеңінен насихатталды.

Этноауылдағы көрмені Шығыс Қазақстан облысының әкімі Нұрымбет Сақтағанов аралап көріп, өңірдің тарихи және табиғи байлығын кеңінен дәріптеуге бағытталған мұндай бастамалардың маңыздылығына тоқталды.

Фестивальдің салтанатты ашылу рәсімінде сөз сөйлеген облыс әкімі Марқакөл мемлекеттік табиғи қорығының 50 жылдық мерейтойымен көпшілікті құттықтап, бұл табиғи аумақтың тек Шығыс Қазақстанның ғана емес, бүкіл елдің мақтанышы екенін атап өтті.

Оның айтуынша, Мемлекет басшысы Қасым-Жомарт Тоқаевтың тарихи шешімімен Марқакөл ауданы қайта құрылғаннан кейін өңірдің дамуына жаңа серпін берілді. Бүгінде ауданның инфрақұрылымы жаңартылып, әлеуметтік нысандар бой көтеріп, жолдар жөнделіп, халықтың тұрмыс сапасын жақсартуға бағытталған жобалар кезең-кезеңімен жүзеге асырылуда.

– Мемлекет басшысының тапсырмасына сәйкес Марқакөл өңірін дамыту – біздің басты міндеттеріміздің бірі. Бұл өңірдің табиғи әлеуеті өте жоғары. Сондықтан біз туризмді дамытуға, инвестиция тартуға, кәсіпкерлікті қолдауға және жаңа жұмыс орындарын ашуға ерекше көңіл бөліп келеміз, – деді Нұрымбет Сақтағанов.

Облыс әкімі туристік саланы дамытудағы маңызды бастамалардың бірі ретінде Қазақстан мен Қытай арасындағы Қанас – Марқакөл трансшекаралық туристік бағытын құру жобасына тоқталды. Қазіргі таңда бұл бастама жан-жақты пысықталуда.

Аймақ басшысының айтуынша, Қытайдағы Қанас көліне жыл сайын шамамен жеті миллион турист келеді. Егер екі ел арасындағы жаңа туристік бағыт іске асса, Марқакөлге келушілер саны бірнеше есе артып, өңірдің халықаралық деңгейдегі туристік орталыққа айналуына мүмкіндік туады. Бұл өз кезегінде шағын және орта бизнестің дамуына, жаңа инвестициялардың тартылуына және жергілікті халықтың табысын арттыруға ықпал етеді.

Мерейтой аясында қорықтың материалдық-техникалық базасын нығайтуға ерекше көңіл бөлінді. Шығыс Қазақстан облысының әкімдігі Марқакөл мемлекеттік табиғи қорығына жаңа қызметтік катердің сертификатын табыс етті. Заманауи техника көл акваториясында табиғатты қорғау жұмыстарын тиімді жүргізуге, инспекторлардың қызметін жеңілдетуге және экологиялық бақылауды күшейтуге мүмкіндік береді.

Салтанатты жиында табиғатты қорғау ісіне көп жылдық еңбегімен үлес қосқан қорық қызметкерлері марапатталды. Оларға құрмет грамоталары мен алғыс хаттар табысталып, өңірдің табиғи байлығын сақтаудағы еңбектері жоғары бағаланды.

Фестивальге Австрия Республикасының Қазақстандағы Төтенше және Өкілетті Елшісі Андреа Бахер де қатысты. Ол өз сөзінде қоршаған ортаны қорғау саласындағы халықаралық ынтымақтастықтың маңызын ерекше атап өтті.

– Климаттың өзгеруі, қоршаған ортаның ластануы және биоалуантүрліліктің азаюы – бүкіл әлемге ортақ мәселе. Мұндай сын-қатерлерді бірлескен күш-жігер арқылы ғана еңсеруге болады. Австрия Қазақстанмен табиғатты қорғау және тұрақты туризмді дамыту бағытындағы ынтымақтастықты жалғастыруға дайын, – деді дипломат.

Ол Марқакөл мемлекеттік табиғи қорығы ұжымын 50 жылдық мерейтойымен құттықтап, қорықтың табиғи байлығын сақтауға бағытталған жұмыстардың алдағы уақытта да жемісті боларына сенім білдірді.

Фестивальдің ресми бөлігінің соңында өңірдің әлеуметтік-экономикалық дамуына үлес қосқан бірқатар азаматтар марапатталды. Ал мерекелік шараның мәдени бағдарламасы Алтайдың көркем табиғаты аясында өткен концертпен жалғасты. Сахнада өнерпаздар халық әндері мен күйлерін орындап, ұлттық би мен заманауи шығармаларды көрермен назарына ұсынды.

«Марқакөл – Шығыстың інжу-маржаны» халықаралық фестивалі табиғатты қорғау, ұлттық мәдениетті ұлықтау және өңірдің туристік мүмкіндіктерін әлемге таныту жолындағы маңызды бастама екенін тағы бір мәрте дәлелдеді. Жарты ғасырлық тарихы бар Марқакөл мемлекеттік табиғи қорығының мерейтойы Алтайдың әсем табиғатын, бай мәдени мұрасын және халықаралық ынтымақтастықтың маңызын айшықтаған айтулы оқиға ретінде есте қалды.