Бүгін Риддер қаласында ерекше рухты, жүрекке жылу сыйлаған мерекелік шара өтті. Кеншілер қаласындағы Төлеген Тоқтаров көшесі бүгін халықпен толып, Отан үшін от кешкен батыр ұлдың есімін ұлықтаған жарқын тойға айналды.

Таңсәріден-ақ Төлеген Тоқтаров атындағы көрікті көшеге жиналған қала тұрғындары мен қонақтары ән мен жыр төгілген думанды мерекенің куәсі болды. Қатысушылар батырдың балалық шағы, көрсеткен ерлігі жайлы тың деректер мен тарихи суреттер арқылы оның өмір жолымен танысты.

Мереке аясында Риддер қаласының жас кадеттері сап түзеп, салтанатты шерумен жүріп өтті. Бұдан соң қалалық мәдениет сарайының шығармашылық ұжымдары ұйымдастырған концерт көрермендерге көтеріңкі көңіл күй сыйлады.

Риддер қаласы әкімінің орынбасары Ерболат Ошақбаев мерекеге келгендердің белсенділігіне ризашылығын білдіріп, бұл шараның тек мәдени іс-шара ғана емес, туған жерге деген сүйіспеншілік пен ұрпақтың батыр бабаға тағзымының айқын белгісі екенін атап өтті.

Шара соңы ұлттық тағамдар ұсынылған шағын жәрмеңке мен балаларға арналған ойын-сауықпен жалғасты.