Шығыс Қазақстан облысының әкімі Нұрымбет Сақтағанов әкімдік отырысында балалардың жазғы демалысын ұйымдастыру мәселесіне айрықша назар аударып, нақты тапсырмалар жүктеді. Өңір басшысы бұл кезеңде балалардың қауіпсіздігіне барынша басымдық берілуі тиіс екенін атап өтті, деп хабарлайды Altainews.kz тілшісі.

Сондай-ақ, Нұрымбет Сақтағанов облыстық білім басқармасы мен қала, аудан әкімдеріне жергілікті бюджет есебінен балалардың жазғы демалысын тиімді ұйымдастырып, оларды пайдалы істерге жұмылдыруды толық қамтамасыз етуді міндеттеді. Әсіресе, көпбалалы және әлеуметтік жағынан аз қамтылған отбасылардан шыққан балалардың 100 пайыз қамтылуы басты талап ретінде қойылды.

Әкім облыс орталығы арқылы өтетін Ертіс өзенінде оқушылар үшін жолаушылар теплоходымен арнайы серуен ұйымдастыруды да тапсырған еді. Бұл бағыттағы жұмыс барысы туралы облыстық білім басқармасының басшысы Инесса Чернышёва баяндады.

Оған қоса, биыл өңірде алғаш рет оқушыларды Шығыс Қазақстанның мәдени-тарихи мұраларымен таныстыруға, балалар мен жасөспірімдер туризмін дамытуға бағытталған «Киелі Шығыс» жобасын іске асыру көзделіп отыр. Жобаға 2000 оқушы іріктеледі, оның ішінен 200 бала жеңімпаз ретінде оқу-танымдық экскурсияларға қатысу мүмкіндігіне ие болады.

Оның айтуынша, жобаны жүзеге асыру үшін 19,8 млн теңге көлемінде қаржы қажет. Қазіргі уақытта тиісті бюджеттік өтінім беріліп, бастама қолдау табады деп күтілуде.