Еңбек адамының қоғамдағы мәртебесін көтеріп, жұмыс өнімділігін арттыруға қолайлы жағдай жасау – бүгінгі күннің маңызды міндеттерінің бірі. Осы мақсатта Шығыс Қазақстанға іссапармен келген ҚР Кәсіподақтар федерациясының төрағасы Сатыбалды Дәулеталин Өскемен көпсалалы технология колледжіне барып, еңбек ұжымымен кездесті, деп хабарлайды Altainews.kz тілшісі.

Қонақтарды ШҚО әкімінің орынбасары Ербол Нұрғалиев пен колледж директоры Қажумқан Оспанғалиев қарсы алды. Колледж басшылығы оқу орнымен таныстырып, ірі өндіріс орындарының қолдауымен жабдықталған шеберханалардағы жұмыс барысын көрсетті. Сатыбалды Телағысұлы еңбек нарығында сұранысқа ие жұмысшы мамандарды даярлау ісінде мұндай құзыреттілік орталықтарының рөлі зор екенін ерекше атап өтті.

Кездесу барысында Сатыбалды Дәулеталин кәсіподақтардың қоғамдағы орны мен рөлінің жоғары екенін атап өтті. 1978 жылы ҮМЗ-ге жұмысшы мамандарды даярлау мақсатында ашылған Өскемен көпсалалы технология колледжінде бүгінде екі бастауыш кәсіподақ ұйымы жұмыс істейді. Оның бірі – «ҮМЗ» АҚ қызметкерлерінің жергілікті кәсіподағы, екіншісі – колледж оқытушыларына әдістемелік және құқықтық қолдау көрсететін облыстық кәсіподақ ұйымына қарасты ұйым. Екеуінің құрамында 100-ден астам кәсіподақ мүшесі бар.

Айта кетейік, ғасырдан астам тарихы бар еліміздегі ең ірі қоғамдық ұйым – Кәсіподақтар федерациясының бүгінде 2 миллионнан астам мүшесі бар. Олардың қатарында 23 салалық кәсіподақ пен 16 мыңнан астам бастауыш ұйым тіркелген.

Оның айтуынша, еңбек адамының құқығы мен мүддесін қорғауды көздейтін кәсіподақ ұйымдарына жүктелген міндеттер кезең-кезеңімен жүзеге асырылып келеді.