«Казцинк» компаниясының Өскемен металлургия алаңындағы мырыш өндірісінің №2 денсаулық сақтау пунктінің кезекші фельдшерлері Лимара Жамелова мен Елена Долгова-Сабурова жұмыс барысында клиникалық өлімге ұшыраған «Казцинк-Транс» кәсіпорнының тиегіш жүргізушісінің өмірін сақтап қалды, деп хабарлайды Altainews.kz тілшісі.

Оқиға туралы таңғы уақытта зардап шеккен қызметкердің әріптесі дереу хабарлаған. Медицина қызметкерлері кәсіпорын аумағындағы оқиға орнына екі минут ішінде жетіп, науқасқа жедел коронарлық синдром тудырған клиникалық өлім диагнозын қойған. Олар дереу реанимациялық шараларды бастап, жүрек қызметін қалыпқа келтіре алды. 25 минуттан кейін науқастың жағдайы тұрақтанған кезде оқиға орнына кардиологиялық жедел жәрдем бригадасы жеткен.

Құтқарылған қызметкер облыстық ауруханаға жеткізіліп, толық тексеруден кейін шұғыл операция жасалды. Көп ұзамай ол реанимациядан жалпы кардиология бөліміне ауыстырылды.

Елена Долгова-Сабурова өндірістік алаңда фельдшер болып 30 жыл жұмыс істеп келеді. Ал Лимара Жамелова – Өскемен қалалық жедел жәрдем станциясының көшпелі бригадасында 10 жыл еңбек еткен тәжірибелі маман. Ол ҚР Денсаулық сақтау министрлігінің «Үздік фельдшер» аталымы бойынша марапатталған. Бұл – оның зауыттағы алғашқы жұмыс ауысымы болған.