Өскемен қаласында биыл жол жөндеу жұмыстары бұрынғы жылдармен салыстырғанда ауқымдырақ әрі қарқынды жүргізілді. Қаланы көркейтіп, қауіпсіз әрі қолайлы көлік қатынасын қалыптастыруға бағытталған кешенді бағдарлама аясында жүздеген жұмысшы мен ондаған техника жұмылдырылды. Қала әкімдігі жөндеу барысын тұрақты бақылауда ұстап, туындаған мәселелерді жедел шешіп отырды, деп хабарлайды Altainews.kz тілшісі.

Өскемен бойынша биыл жолды орташа жөндеу көлемі 42 шақырымды құрады. Бұл – соңғы жылдардағы ең ірі көрсеткіштің бірі. Орташа жөндеу аясында асфальттың үстіңгі қабаты түгел ауыстырылып, жолдың жүру бөлігі тегістеліп, жеке учаскелерде су ағатын науалар қалпына келтірілді. Бұл жұмыстардың барлығы ресми конкурстар арқылы анықталған жергілікті мердігер ұйымдардың қатысуымен жүргізілді. Олар бекітілген мерзім мен техникалық талаптар бойынша жұмыс атқарды. Қаланың негізгі көлік жүретін көшелерінде жол сапасы айтарлықтай жақсарды.

Асфальт жабыны жоқ шеткі аумақтардағы 46 шақырым жолдың 38 шақырымына қиыршық тас төселіп, жол тегістелді. Бұл бағытта көп жылдан бері жөндеу көрмей келген көшелердің мәселесі шешіле бастады. Бұрын көктем мен күз айларында батпақ болып, жүру қиындаған бұл аумақтарда көлік қатынасы оңтайлы бола түсті.

Жол сапасын сақтап қалуға бағытталған шұңқырларды жамау жұмыстары да кең көлемде жүргізілді. Биыл 42,1 мың шаршы метр асфальт жабындысы қалпына келтірілді. Күзгі маусымда қосымша 4 мың шаршы метр жөнделіп, жалпы көлем 46 мың шаршы метрге жуықтады. Бұл жұмыстар қаладағы ұсақ ақауларды дер кезінде реттеу арқылы жолдың жалпы жағдайын жақсартуға мүмкіндік берді.

Жаяу жүргіншілерге қауіпсіз әрі ыңғайлы орта қалыптастыру – биылғы жол жөндеу бағдарламасының негізгі бағыттарының бірі. Жыл басында белгіленген 11 шақырым тротуардың 7 шақырымы толық жаңартылды. Ескі плиткалар ауыстырылып, жаңа жүру жолдары салынды. Бұл қолжетімді орта қалыптастыруға ерекше көңіл бөлінді.

Тұрғындардың ең көп сұранысы бойынша аулаішілік жөндеу жұмыстары қолға алынды. Биыл 95 ауладағы жолдар жөнделіп, 39 мың шаршы метр асфальт қалпына келтірілді. Соның ішінде 31,5 мың шаршы метр – орташа жөндеу, ал 7,5 мың шаршы метр – шұңқырларды жамау жұмыстары. Аулаішілік аумақтар жаңа келбетке еніп, тұрғын үй кешендері арасындағы жол қозғалысы қауіпсіз бола түсті.

Жолдардың құрылымын реттеу мақсатында 4,6 шақырым жаңа бордюрлер қойылды. Бұл – жаңадан жөнделген көшелердің беріктігін арттырып, тротуар мен жүру бөлігін нақты бөліп тұратын маңызды элемент.

Жөндеу науқаны кезеңінде кейбір көшелер бойынша тұрғындардың шағымдары түсіп отырды. Бір жерде мердігер жұмысы баяуласа, басқа учаскелерде техниканың жетіспеуі байқалған. Осындай жағдайларда қала әкімі шағым болған жерге шығып, мердігерлерге нақты уақыт белгілеп отырды. Соның арқасында ұзақ жыл жөндеу көрмеген көшелер – әсіресе, жеке сектордағы жолдар уақытылы жөнделіп, жоспар толық орындалды.

Биылғы жұмыстың ерекшелігі — көп жыл бойы назардан тыс қалған көшелер қамтылды. Бұлар әсіресе жеке сектор тұрғындарына үлкен қолайлылық туғызды.

Жол сапасы – қаланың даму деңгейінің басты көрсеткіштерінің бірі. Биылғы маусымда атқарылған жұмыстар Өскеменнің көлік инфрақұрылымын біршама жақсартып, тұрғындардың өмір сүру сапасын арттыруға ықпал етті.