Бүгін облысқа жұмыс сапарымен келген Қазақстан Республикасы Сауда және интеграция вице-министрі Жанель Кушукова Өскемен қаласында орналасқан «Силумин-Восток» ЖШС-де болды. Сонымен қатар таяуда ғана жаңа өндірісті іске қосқан «ALTAI MAI» зауытында өндірістің жұмыс барысымен танысты, деп хабарлайды Altainews.kz тілшісі.

«Силумин-Восток» кәсіпорыны қазіргі таңда тау-кен өндірісіне, энергетика, жылу энергетикасына, тұрғын-үй коммуналдық шаруашылығына, су айдау және сумен қамтамасыз етуге қажетті өндірістік қондырғыларды, түрлі салада сұранысқа ие сорғыларды, датчиктерді, өлшеуіш құралдарды, бекіткіш арматураларды, электротехникалық, өнеркәсіптік суытқыш, өнеркәсіптік автоматтандыру, компрессорлық жабдық және ауамен жабдықтау қондырғыларын, тексеру зертханасын жасап шығарады.

Өңірдегі ірі кәсіпкерлік кәсіпорындардың бірі саналатын «Силумин-Восток» ЖШС-і қазіргі кезде төрт жүзден аса адамды тұрақты жұмыспен қамтып отыр.

Зауыттың жекелеген цехтарының жұмысын вице-министрге кәсіпорынның даму бойынша директоры Наталья Макридина таныстырды.

Қоса кетейік, елуден астам тұрақты корпоративтік тапсырыс берушісі қалыптасқан «Силумин-Восток» базасында өндірілген құрал-жабдықтар мен қондырғылар елімізден бөлек көршілес Ресей Федерациясында, Қырғызстанда, Еуропа елдерінде үлкен сұранысқа ие. Дайын өнімдер тапсырыспен Гренландияға да жеткізілген.

Кәсіпорынның жұмыс қарқынына көңілі толатындығын жеткізген вице-министр алдағы уақытта да осы қарқынды жоғалтпауды, бірінші кезекте сапаға басымдық беруді тапсырды.

Күнбағыс майының сексен пайызы экспортқа шығарылады

Келесі ретте вице-министр Жанель Сабырқызы облыс орталығындағы Абай даңғылының бойында орналасқан, өндіріс циклі екі апта бұрын ғана іске қосылған іргелі кәсіпорын «ALTAI MAI» ЖШС-нің базасында болды.

Майлы дақылдарды қайта өңдеу бойынша толық циклді заманауи көпдақылды май экстракциялау зауытының бас директоры Жәнібек Бақаевтың айтуынша, жұмысын енді бастаған жаңа зауыт тәулігіне 500 тонна шикізатты терең өңдей алады.

Өңір аудандары мен көршілес Абай, Павлодар, Қостанай облыстарынан қабылданатын күнбағыс дәні мұнда бірнеше циклді толық өндеуден өтіп, тазартылған күнбағыс майы бір және бес литрлік дайын пластик ыдыстарға құйылады. Зауыт аумағында шекілдеуік кептіретін элеватор, шикізат сақтайтын алып қойма және сапалы дайын майды сақтайтын цистерналар да орналасқан. Май әзірлейтін қондырғылар көрші Ресейден жеткізілген.

Компания басшылығы сыртқы нарыққа өндірілетін өнімнің 80%-на дейін сатуды жоспарлап отыр. Ішкі нарықта өнімнің 20 пайыздан аспайтын бөлігі сатылмақ. Қазір өнімді Орталық Азия өңіріне өткізу мүмкіндігі қарастырылып жатыр.

Өндірістің ерекшелігі – технологияның мүлде қалдықсыз жұмыс істеуі. Май толық сығылып алынғасын, алғашқы қалдықтан жем (шрот) дайындалып, ауылшаруашылық саласындағы мал, құс өсіруші фермерлерге сатылады.

Вице-министр Жанель Кушукова өз кезегінде зауыт жетекшілерінен шаруаны ұйымдастыру, дайындалған өнімді сақтау, шетелге шығару жұмыстары қалай атқарылатынын сұрастырды. Кәсіпорын жұмысын енді бастап жатққандықтан, халыққа кеңінен насихаттау, дайын өнімді жарнамалау жағына баса екпін түсіру керектігін айтып, бұл ретте өңірлік, республикалық бұқаралық ақпарат құралдарымен өзара бірлесе жұмыс істеуді тапсырды.

Дәурен Аллабергенұлы 

Фото: Жібек Нұрахмет;