ҚР Премьер-министрінің орынбасары Қанат Бозымбаев пен ШҚО әкімі Нұрымбет Сақтағанов облыстық мекемеаралық бірегей ситуациялық орталықта болып, өңірдің су тасқыны қаупі мен өрт қауіпсіздігі жағдайлары туралы есеп тыңдады, деп хабарлайды Altainews.kz тілшісі.

Қазіргі уақытта облыста су тасқыны қаупі сейіліп, күннің күрт жылынуына байланысты өрт қаупі күшейіп отыр. Бұл туралы ШҚО ТЖД бастығы Рашид Билялов баяндама жасады.

Қанат Алдабергенұлы ТЖД техникаларының тозу деңгейі туралы сұрақ қойды. Департамент басшысы техникалардың 78%-ы тозғанын, жергілікті атқарушы биліктің қолдауымен 80 бірлік техника жаңартылғанын мәлімдеді.

Тілсіз жаудың ең қауіпті түрі – орман өрті. Бұл бағыттағы дайындық жұмыстарын ШҚО Табиғи ресурстар және табиғат пайдалануды реттеу басқармасы басшысының орынбасары Мерхат Амиров таныстырды.

ШҚО бойынша «Қазгидромет» РМК филиалының директоры Ләззат Болатқан су тасқыны қаупінің екінші кезеңі тұрақты өткенін айтты.

Сонымен қатар, Қанат Алдабергенұлына су тасқыны қаупін болжау жүйесі таныстырылды. ШҚО мұрағат және цифрландыру басқармасының бағдарламалық қамтамасыз ету менеджері Шоқан Ілияс цифрлы жүйенің жұмысын таныстырды.

Қанат Бозымбаев жүйенің мүмкіндіктеріне қатысты бірқатар сұрақ қойып, жауап алды. Ол су тасқыны ахуалының бірқалыпты екенін, бірақ алдын алу шараларын жалғастыру керектігін атап өтті. Сонымен қатар, өрт қаупінің жоғары екенін ескертіп, дайындық жұмыстарын күшейту туралы тапсырмалар берді.