Мәдениет және ақпарат министрлігі Ұлы Отан соғысына қатысқан қазақстандық майдангерлерді еске алу мақсатында «Батырларға тағзым» атты бірегей онлайн-порталды іске қосты. Порталдың мақсаты – Ұлы Жеңіске өлшеусіз үлес қосқан қазақстандықтардың ерлігі мен жанкештілігі туралы құнды ақпараттарды болашақ ұрпаққа жеткізу, деп хабарлайды Altainews.kz тілшісі.

Бұл онлайн-платформада қазіргі кезде 677 мыңнан астам соғыс ардагері туралы мәлімет бар. Олардың арасында 365 Кеңес Одағының батыры, 4 екі мәрте Кеңес Одағының батыры және 19 «Даңқ» орденінің кавалері бар. Порталдағы мәліметтер кең көлемді және тарихтағы батырлардың ерлігін ұлықтау үшін үлкен мүмкіндік береді.

Портал интерфейсі әр пайдаланушыға қажетті ақпаратты табуға ғана емес, өз ардагер туыстары туралы деректерді қосуға, сонымен қатар жаңалықтармен танысуға мүмкіндік береді. Бұл онлайн алаң болашақ ұрпақ үшін тарихты сақтап, батырларға тағзым етіп, құрмет көрсетуге арналған бірегей платформа қызметін атқарады.

Порталдың мүмкіндіктері:

Туысқанның тарихын қосу: Пайдаланушылар өз туыстарының соғысқа қатысуы туралы деректерді порталға қосып, естеліктерімен бөлісе алады.

Фотосуреттерді жүктеу: Қолданушылар ардагерлерінің суреттерін сайтқа жүктеп, олардың бейнесін мәңгілікке сақтай алады.

Жаңа мәліметтерді қосу: Порталдың дерекқорында жоқ ардагерлердің мәліметтерін енгізуге болады.

Батырлар галереясы: Қазіргі уақытта порталдың галереясында көптеген батырлардың өмірбаяндары мен ерліктері жайлы мәліметтер бар.

Жаңалықтар бөлімі: Порталда ардагерлер мен жобаға қатысты жаңалықтар үнемі жаңарып отырады.

Онлайн-портал Қазақстанның батырларына тағзым етіп, олардың есімін ұлықтау мақсатында маңызды қадам. Портал арқылы әрқайсымыз өз туысқандарымыздың ерлігін мәңгі есте сақтап, келешек ұрпаққа жеткізе аламыз.