10-17 маусым күндері аралығында Өскеменде жергілікті атқарушы орган өкілдері арасында дәстүрлі республикалық спартакиада өтеді. Бүгін Ольга Рыпакова атындағы жеңіл атлетика орталығында спорттық шараның салтанатты ашылу рәсімі өтті, деп хабарлайды Altainews.kz тілшісі.

Биыл шығыс өңірінде ұйымдастырылып отырған бұл спартакиадаға Астана, Алматы, Шымкент қалалары мен Абай, Ақмола, Ақтөбе, Атырау, Алматы, Жамбыл, Жетісу, Қарағанды, Қостанай, Қызылорда, Маңғыстау, Павлодар, Түркістан, Ұлытау, Батыс Қазақстан және Шығыс Қазақстан облыстарынан командалар жиналды.

Бес күнге жалғасатын спорттық бәсекеде мемлекеттік қызметшілерден құралған 19 команда өзара бақ сынайды. Қатысушылар мини-футбол, волейбол, жүзу, арқан тарту, шахмат, тоғызқұмалақ, үстел теннисі, қазақ күресі, баскетбол 3х3 сияқты спорт түрлері бойынша жарысады.

Ұйымдастырушылардың айтуынша, 1000-ға жуық мемлекеттік қызметшіні біріктірген бұл жарыс салауатты өмір салтын насихаттап қана қоймай, ұжымдық рухты нығайтып, бір мақсат жолында біріге әрекет етуге үйретеді. Былтыр бұл дода Ақтөбе қаласында 8 спорт түрінен өткен болатын. Ал биыл жарыс бағдарламасына баскетбол 3х3 пен арқан тарту енгізіліп, гір тасын көтеру спорты алынып тасталды.

Фото: Махаббат Ахметжанова