Жаңа оқу жылында ШҚО-да үш мектеп пайдалануға берілді
Мемлекет басшысы Қасым-Жомарт Тоқаев 2025 жылғы Қазақстан халқына Жолдауында білім беру ісіне айрықша мән берді. Президент «Келешек мектептері» ұлттық жобасы аясында жоспарланған 217 мектептің 150-і жұмыс істеп тұрғанын атап өтіп, қалған білім нысандарының құрылысын аяқтауды тапсырды.
Шығыс Қазақстан облысы әкімінің баяндамасында жалпы сыйымдылығы 200 орын болатын екі мектептің салынғаны, ал жалпы сыйымдылығы 350 орын болатын төрт білім нысанының құрылысы жүргізіліп жатқаны айтылған. Төрт жобаның жалпы құны шамамен 4 млрд теңгені құрайды. Бұдан бөлек, Риддер қаласындағы 600 орындық мектеп құрылысының аяқталуға жақын екені көрсетілген.
2026 жылғы 1 қыркүйекте Шығыс Қазақстан облысында жалпы сыйымдылығы 800 орын болатын үш жаңа мектеп ашылды. Білім нысандары Риддер қаласында, Самар және Қайнарлы ауылдарында пайдалануға берілді.
Риддердегі жаңа білім ордасы 600 оқушыға арналған
Риддер қаласының бесінші шағынауданында мемлекеттік тілде білім беретін 600 орындық жаңа мектеп жұмысын бастады. Нысан «Қазцинк» ЖШС қаражаты есебінен салынды.
Мектептің жалпы аумағы 10 мың шаршы метрден асады. Ғимарат үш блоктан тұрады. Мұнда оқу кабинеттері, шеберханалар, кітапхана, ресурстық орталық және бастауыш сынып оқушыларына арналған жеке аймақ орналасқан.
Білім ордасында үлкен және шағын спорт залдары, 135 орындық акт залы, медициналық блок, логопед пен психолог кабинеттері және асхана бар. Аумақта футбол, волейбол және баскетбол алаңдары, ұзындығы 250 метр болатын жүгіру жолы жабдықталған.
Жаңа оқу жылында осы мектептің бірінші сыныбына 60-тан астам бала қабылданды.
Самар ауылында 40 жылдан астам уақыттан кейін алғаш рет жаңа бастауыш мектеп ашылды
Самар ауылында 150 орындық жаңа бастауыш мектеп ашылды. Нысан облыстық бюджет қаражаты есебінен бой көтерді.
Екі қабатты ғимараттың жалпы аумағы шамамен 3,8 мың шаршы метрді құрайды. Мұнда оқу кабинеттері, спорт залы, кітапхана, асхана, логопед кабинеті және шағын орталық орналасқан. Мектеп аумағында шағын футбол алаңы қарастырылған.
Жаңа білім ордасының бірінші сыныбына 14 бала барды. Жалпы Самар ауданында 2026–2027 оқу жылында 172 бала бірінші сыныпқа қабылданды.
Қайнарлыда шағын орталығы бар мектеп жұмысын бастады
Марқакөл ауданының Қайнарлы ауылындағы 50 орындық білім нысаны пайдалануға берілді. Ғимарат заман талабына сай жабдықталған.
Риддер қаласы мен Самар, Қайнарлы ауылдарындағы жаңа мектептер 2026–2027 оқу жылында оқушыларды қабылдай бастады.
Білім саласы: деректер мен көрсеткіштер
Шығыс Қазақстан облысында 347 мемлекеттік және 7 жекеменшік мектеп жұмыс істейді. Бастауыш сынып оқушыларына және әлеуметтік осал санаттарға жататын 7 мыңнан астам балаға тегін ыстық тамақ беріледі. Бұл мақсатқа 6 млрд теңгеден астам қаражат бөлінген.
Облыста 3 пен 6 жас аралығындағы балаларды мектепке дейінгі тәрбиемен қамту көрсеткіші 100 пайызды, 2 мен 6 жас аралығындағы балалар бойынша 99,1 пайызды құрайды. Екі жекеменшік балабақша ашылып, алты мектепке дейінгі ұйымның кеңейтілуі нәтижесінде қосымша 350 орын құрылды. Әлеуметтік осал топ санатындағы 5 239 бала мектепке дейінгі ұйымдарға тегін барады.
