Мемлекет басшысына Пәкістанның ең жоғары мемлекеттік наградасы табысталды
Қазақстан Республикасының Президенті Қасым-Жомарт Тоқаев Пәкістан Ислам Республикасының ең жоғары мемлекеттік наградасы — Nishan-e-Pakistan орденімен марапатталды. Бұл орден ел дамуына айрықша үлес қосқан Пәкістан азаматтарына, сондай-ақ шетелдік мемлекет және қоғам қайраткерлеріне беріледі. Бұл туралы Ақорданың баспасөз қызметі жария етті, деп хабарлайды Altainews.kz тілшісі.
Исламабадта өткен салтанатты рәсімде Пәкістан Президенті Асиф Али Зардари мен Премьер-министр Шахбаз Шариф Мемлекет басшысына жоғары награданы табыстады. Қасым-Жомарт Тоқаев Пәкістан тарапына көрсетілген қонақжайлық пен сапардың жоғары деңгейде ұйымдастырылғаны үшін алғыс білдірді.
Президент соңғы отыз жылдан астам уақыт ішінде Қазақстан мен Пәкістан арасында мазмұнды саяси диалог қалыптасып, екіжақты ынтымақтастық түрлі салада жүйелі түрде нығайып келе жатқанын атап өтті. Оның айтуынша, Қазақстан мен Пәкістанның геосаяси орналасуы екі елдің ұзақ мерзімді стратегиялық мақсаттарына қол жеткізуіне мүмкіндік береді.
Мемлекет басшысы Премьер-министр Шахбаз Шарифпен жүргізілген келіссөздер нәтижесінде Астана мен Исламабад арасындағы қарым-қатынасты жаңа стратегиялық деңгейге көтеруге бағытталған Бірлескен декларацияға қол қойылғанын жеткізді. Бұл құжат екі елдің барлық бағыт бойынша ынтымақтастықты кеңейтуге ниетті екенін көрсетеді.
Қазақстан–Пәкістан бизнес форумы барысында Қасым-Жомарт Тоқаев екі ел арасындағы сауда-экономикалық байланыстардың қарқынды дамып келе жатқанын айтты.
Форум аясында жалпы құны 200 миллион долларға жуық 30-дан астам келісімге қол қойылған. Былтыр екі ел арасындағы тауар айналымы екі есеге жуық артқан. Қазіргі таңда Қазақстанда Пәкістан капиталының қатысуымен 200-ден астам компания жұмыс істейді.
Президент алдағы уақытта екіжақты сауда көлемін 1 миллиард долларға дейін жеткізуді мақсат етіп отырғанын атап өтті. Сондай-ақ Үкіметке Қазақстан мен Пәкістанның бизнес құрылымдары арасындағы ықпалдастықты, оның ішінде Үкіметаралық комиссия шеңберіндегі жұмысты жандандыруды тапсырды.
Сапар қорытындысында Мемлекет басшысы бұл тарихи кездесу Қазақстан мен Пәкістан арасындағы серіктестікке жаңа серпін беріп, екі халықтың ортақ өркендеуіне қызмет ететініне сенім білдірді.
