Өскемен қаласындағы Оралхан Бөкей атындағы орталық қалалық кітапханада саяси қуғын-сүргін құрбандарын еске алуға арналған «Тарихтан тағылым – өткенге тағзым» атты танымдық кездесу өтті, деп хабарлайды Altainews.kz тілшісі.

Шараға мәдениет саласының ардагерлері, өлкетанушылар, еңбек майталмандары, мектеп оқушылары мен қала тұрғындары қатысты. Жиын барысында қатысушылар қуғын-сүргін жылдарындағы қоныс аударушылардың санына қатысты тарихи деректермен бөлісіп, нақты адамдардың тағдыры арқылы сол кезеңнің ауыр шындығын жеткізді. Сондай-ақ, жазықсыз жапа шеккендерді ақтау үдерісінің қалай жүргені туралы баяндады.

Бүгінде саяси қуғын-сүргін құрбандарын толық ақтау жөніндегі мемлекеттік комиссия 311 мыңнан астам азаматтың абыройын қайтарып, әділеттілікті қалпына келтіргені айтылды.

Қала әкімінің орынбасары Ирина Смит мұндай кездесулер жас ұрпақтың тарихи жадысын тәрбиелеуде ерекше рөл атқаратынын атап өтті.
Шара аясында сталиндік қуғын-сүргінге ұшыраған жерлесіміз, бұрынғы Улан ауданының бірінші хатшысы Абдрахман Айдарбеков туралы деректі фильм көрсетілді. Қатысушылардың айрықша назарын аудартқан бұл туынды қайғы мен қайсарлыққа толы бір тағдырдың беймәлім беттерін ашты.

Сонымен қатар саяси қуғын-сүргін тақырыбына арналған кітап көрмесі ұйымдастырылды.

Кездесу мектеп оқушыларының жүрек тебірентер өлеңдер оқуымен қорытындыланды. Жиынға қатысушылар мұндай шаралар жас буынның ел тарихына деген терең түсінігін қалыптастырып, азаматтық жауапкершілігін нығайтатынын атап өтті.

Роксана Глыбова
Фото/видео: Екатерина Семина