#Жаңалықтар / Шығыс Қазақстан / Өскемен 14-08-2026, 08:09 · Жаңалықтар

Құрылтай сайлауы: ШҚО-дағы дайындықтың жай-жапсары пысықталды

14-08-2026, 08:09

Өскеменде 2026 жылғы 23 тамызға тағайындалған Қазақстан Республикасы Құрылтайы депутаттарының сайлауын дайындау және өткізу мәселелері бойынша ШҚО мемлекеттік органдары өкілдерімен кеңес өтті. Жиында сайлау учаскелерінің дайындығы, комиссия мүшелерін оқыту, материалдық-техникалық қамтамасыз ету және дауыс беру күні қауіпсіздікті сақтау мәселелері талқыланды.

Орталық сайлау комиссиясының мүшесі Михаил Бортниктің айтуынша, қазір ОСК мүшелері өңірлерге шығып, сайлауға дайындықтың қалай жүріп жатқанын тексеріп жатыр. Шығыс Қазақстандағы жұмыс барысында да бірнеше негізгі бағытқа назар аударылған.

– Бүгінде біз Шығыс Қазақстан облысының сайлауға дайындығына қатысты мәселелерді пысықтап жатырмыз. Бірінші кезекте сайлау комиссияларының, сайлау учаскелерінің дайындығы, олардың материалдық-техникалық жабдықталуы қаралады. Сонымен қатар комиссия мүшелерін оқытуға үлкен мән береміз, – деді Михаил Бортник.

Оның айтуынша, сайлау комиссиясы мүшелерінің заңды білуі ғана емес, оны дауыс беру күні дұрыс қолдана алуы да маңызды.

– Заңдарды білу және оны сайлау күні дұрыс қолдану – өте маңызды мәселе. Бұған сайлаушылар да, байқаушылар да назар аударады. Комиссия мүшелері мен барлық дайындық жұмыстары қаншалықты сапалы жүргізілсе, сайлау процесін ұйымдастыру да соғұрлым дұрыс болады, – деді ОСК мүшесі.

Михаил Бортник Шығыс Қазақстандағы сайлау комиссиялары мен учаскелерінің қазіргі дайындығына қатысты да пікір білдірді.

– Кеше біз облыстың сайлау комиссияларымен отырыс өткіздік. Қолымыздағы ақпаратқа сүйенсек, қазіргі таңда Шығыс Қазақстандағы комиссиялар мен учаскелер дайын. Дегенмен комиссия мүшелерін оқыту жұмысы әрі қарай жалғасады. Ертең де сайлау комиссияларының мүшелерімен жұмыс семинары өтеді, – деді ол.

Құрылтай депутаттарының сайлауы 2026 жылғы 23 тамызға белгіленген. Дайындық жұмыстары Орталық сайлау комиссиясы бекіткен күнтізбелік жоспарға сәйкес жүргізіліп жатыр. Михаил Бортник сайлау процесіне жергілікті атқарушы органдар мен басқа да ұйымдар тартылғанын атап өтті.

– Жергілікті атқарушы органдар мен сайлауды дайындауға және өткізуге қатысатын ұйымдардың жұмысы да маңызды. Қазір Орталық сайлау комиссиясының мүшелері өңірлерге шығып, олардың қаншалықты дайын екенін қарап жатырмыз. Бұл жерде қауіпсіздік, комиссия мүшелерін ұйымдастыру және оқыту, учаскелік комиссиялардың материалдық-техникалық жағдайы сияқты мәселелердің барлығы қамтылады, – деді ол.

Сайлау барысындағы маңызды бағыттың бірі – қауіпсіздікті қамтамасыз ету. Бұл жұмысқа полиция да алдын ала кіріскен. ШҚО Полиция департаменті Әкімшілік полиция басқармасы бастығының орынбасары Игорь Клишиннің айтуынша, полиция аумақтық сайлау комиссияларымен және басқа да мемлекеттік органдармен бірлесіп жұмыс істеп жатыр.

– Сайлауды дайындауға қатысты ақпаратты уақытында жинау, өңдеу және қорытындылау бойынша аумақтық сайлау комиссияларымен және басқа да мемлекеттік органдармен өзара жұмыс жүргізіліп жатыр, – деді ол.

Қазір полиция сайлау учаскелерінің қауіпсіздігін тексеріп жатыр. Әсіресе қауіпсіздік тұрғысынан осал нысандарға басымдық берілген.

– Қазір сайлау учаскелерін жоспарлы түрде тексеріп жатырмыз. Әсіресе осал нысандарға жататын учаскелерге көңіл бөлінеді. Қалған учаскелер де жоспар бойынша тексеріледі. Бюллетеньдер учаскелерге жеткізілгеннен кейін оларды қайта қарап шығу жұмыстары жүргізіледі, – деді Игорь Клишин.

Полиция сайлау алдындағы үгіт жұмыстарына қатысты жағдайды да бақылауда ұстап отыр. Патрульдік полиция қызметкерлері үгіт материалдары орналастырылған орындарды күн сайын тексереді. Бұл ретте бейнебақылау жүйелері де қолданылады. Камералар Полиция департаментінің Жедел басқару орталығы мен кезекші бөлімдеріне қосылған.

– Үгіт басталғалы бері материалдарды әдейі бүлдіру фактілері болған жоқ. Бұл мәселеге қатысты 102 арнасына да хабарлама түскен жоқ, – деді Игорь Клишин.

Қазір Шығыс Қазақстанда сайлауға дейінгі дайындық жұмыстары жалғасып жатыр. Оған сайлау комиссияларының жұмысын пысықтау, мүшелерді оқыту, учаскелерді қажетті құралдармен қамтамасыз ету және қауіпсіздік шараларын тексеру кіреді. Орталық сайлау комиссиясы мен өңірдегі мемлекеттік органдардың алдында тұрған негізгі міндет – 23 тамыздағы дауыс берудің заң талаптарына сай, қауіпсіз әрі ұйымдасқан түрде өтуін қамтамасыз ету.

Тағыда оқыңыз