Қазақстан халқы 20,4 млн адамнан асты: өсім мегаполистер есебінен

Ұлттық статистика бюросы 2026 жылғы 1 қаңтардағы жағдай бойынша Қазақстан халқының саны туралы деректерді жариялады. Ресми мәліметке сәйкес, елде 20 495 975 адам тұрады. Бір жыл ішінде халық саны 212 576 адамға артқан.

Екі өңірде халық саны 2 миллионнан асты. Түркістан облысында 2 148 658 адам тұрады, алайда бір жылда халық саны 5 383 адамға азайған. Алматы қаласында 2 347 924 адам бар, өсім — 55 869 тұрғын.

Сондай-ақ халқы 1 миллионнан асатын өңірлер:

• Астана — 1 638 233 адам (+109 530);

• Алматы облысы — 1 596 331 адам (+36 207);

• Шымкент — 1 293 648 адам (+37 484);

• Жамбыл облысы — 1 215 373 адам (–7 018);

• Қарағанды облысы — 1 131 287 адам (–2 646).

Ең аз халық саны Ұлытау облысында тіркелген — 218 993 адам (–2 297), Солтүстік Қазақстан облысында — 514 156 адам (–8 015) және Абай облысында — 595 676 адам (–7 156).

Урбанизация үдерісі жалғасуда: қала халқы 13 029 803 адамға жетіп, бір жылда 256 688 адамға артты. Ауылдық жерлерде халық саны 7 466 172 адамды құрап, 44 112 адамға қысқарған.

Жалпы үрдіс өзгеріссіз: халық өсімі ірі қалаларда шоғырлануда, ал бірқатар өңірлерде тұрғындар саны азаюын жалғастыруда.