Шығыс Қазақстан облысы әкімдігінің кеңейтілген отырысында облыстық жұмыспен қамту және әлеуметтік бағдарламаларды үйлестіру басқармасының басшысы Альмира Мусинова өңірде халықты еңбекпен қамту басты мақсат екенін атап өтіп, биылғы жұмыспен қамтудың барысын тарқатты. Бұл бағыттағы жұмыстар аясында қазіргі таңда жоспардың 26 пайызы орындалған, деп хабарлайды  Altainews.kz тілшісі.

Қарапайым тұрғындар үшін жұмыс табу – үйге нан табу, бала-шағаны асырау, ертеңге сеніммен қарау. Бұл сөзбен айтқанда – күнделікті қам-қарекет, ал ел үшін – экономиканың тірегі, халықтың әл-ауқаты. Шығыс Қазақстан облысында биыл бұл бағытта ауқымды шаруа қолға алынған. Жергілікті атқарушы органдар «Жұмыспен қамтудың өңірлік картасын» бекітіп, 2025 жылдың соңына дейін 28 600 жаңа жұмыс орнын ашуды жоспарлап отыр. Бұл аз емес. Оның 19 400-і тұрақты жұмыс орны, яғни ұзақмерзімді, тұрақты табыс көзі саналатын лауазымдар. Ал 9 200 уақытша жұмыс – маусымдық немесе белгілі бір мерзімге арналған еңбек.

Бұл – құрылыс, инфрақұрылым, қызмет көрсету, білім беру, денсаулық сақтау сияқты түрлі салада мыңдаған адам енді өзіне лайық кәсіп таба алады деген үміт. Жұмыссыз жүрген азаматтар қайтадан еңбекке араласып, отбасына пайдасын тигізеді. Жастар бірінші еңбек тәжірибесін жинақтайды. Бұл тіпті ауылдағы ағайынға дейін жететін мүмкіндік.

Ал осы жоспардың орындалуы қалай? Жылдың алғашқы бес айында облыс бойынша 7 400 жұмыс орны ашылған. Оның 4 000-ы тұрақты, 3 400-і уақытша жұмыс. Яғни, бүгінге дейін жалпы меженің 26 пайызы орындалды. Бұл бір қарағанда аз көрінуі мүмкін. Алайда жыл жаңа басталғанын, маусымдық жұмыс көбінесе жазда жанданып, күзге қарай тұрақталатынын ескерсек, бұл – сенім ұялататын қарқын. Әсіресе ірі жобалар іске қосылғанда жоспардың күрт алға жылжуы әбден мүмкін.

Қазіргі таңда Шығыс Қазақстан облысындағы жұмыссыздық деңгейі – 4,6%. Ал жастар арасындағы жұмыссыздық 3,7% шамасында. Бұл – ел бойынша орта көрсеткіштен төмен. Салыстыру үшін айтсақ, Қазақстан бойынша орташа жұмыссыздық деңгейі – 4,8%.

Осы бір пайыздың өзі біршама адамның тағдырын өзгерте алады. Бұл – жұмыс тапқан, өзін қоғамның бір мүшесі сезінетін мыңдаған адам. Қалалық болсын, ауылдық болсын – әр адамның еңбегі маңызды. Жастар да өзіне орын табуда: тәжірибеден өтіп, мамандығы бойынша жұмысқа орналасып жатыр.

Басқарма басшысы атап өткендей, бұл жоспарды орындау үшін бір ғана қағаз жүзіндегі ниет жеткіліксіз. Жобалардың жергілікті жерде нақты іске асуы керек. Жұмыспен қамту орталықтары халықпен белсенді жұмыс істеуі қажет. Әсіресе ауыл тұрғындарына, жастар мен әлеуметтік әлсіз топтарға бағытталған шаралар күшейтілуі тиіс.

Шығыс Қазақстан – өндіріс пен аграрлы сала қатар дамып жатқан аймақ. Бұл – экономиканың әр сатысында жұмыс орындарын көбейтуге мүмкіндік береді. Егер аталған 28 мың жұмыс орны дер кезінде және әділ бөлініп, шын мұқтажға берілсе – бұл аймақтағы әр отбасында ертеңге деген сенім артады деп отыр құзырлы мамандар.

Фото: pexels.com