Биыл Шығыс Қазақстанда жолдар жаппай жөнделіп жатыр. Жолаушылар көлігі және автомобиль жолдары басқармасының мәліметінше, осы жылы барлығы 960 шақырым жол жөнделді. Бұл жұмыстарға түрлі көздерден шамамен 83 миллиард теңге бөлінген. Жыл соңына дейін соның ішінде 856 шақырым жол пайдалануға берілмек.

Облыстық жолаушылар көлігі және автомобиль жолдары басқармасы басшысының орынбасары Нұрбек Тұраровтың айтуынша, бұл – өңір үшін өте маңызды әрі жүйелі өзгерістер кезеңі.

Бүгінгі таңда облыстың әлеуметтік маңызы бар 157 маршрутында жолаушылар тасымалы жүзеге асуда. Бұл – өңір халқының 75%-ын автобуспен қамтып отырған жүйе. Осы жылдан бастап ауылдарға қатынайтын 15 бағыт толық жаңартылып, Өскеменнен Зайсанға, Күршімге, Алтайға, Шемонаихаға (Верх-Уба арқылы), Бозанбайға, Жаңа Үлбіге бағыттар қайта ашылды.

Бұл маршруттарды жаңарту – облыс тұрғындарының сұранысы мен әлеуметтік қажеттіліктеріне негізделген шешім.

Маршруттарды үздіксіз қамтамасыз ету үшін мемлекет тарапынан қолдау да қарастырылған. Жолаушылар тасымалын субсидиялау Инвестициялар және даму министрлігінің бұйрығына сәйкес жүзеге асады. Бұл – тарифтерді ұстап тұру және тасымалдаушылардың қаржылық тұрақтылығын қамтамасыз етуге бағытталған тетік. Қазіргі тарифпен автобус жүргізу тиімсіз болса, бағыттар тоқтап қалуы мүмкін. Сондықтан мемлекет тарапынан субсидия беру – әлеуметтік әділеттіліктің бір көрінісі.

Жол-көлік қауіпсіздігін қамтамасыз ету үшін алдын алу шаралары кешенді түрде жүзеге асуда. Атап айтқанда апатты учаскелерде полиция патрульдері көбейтілді, жол жиегіне стробоскоптар мен патруль көліктерінің макеттері қойылды, жолшылар шұңқырларды уақытылы жамап, белгілерді жаңартып, жол жиегіндегі шөпті шауып тұрады, ірі елді мекендердің шыға берісіне 4 электронды LED-тақта орнатылып, жүргізушілерге ауа райы және жол жағдайы туралы жедел ақпарат берілуде.

Бүгінгі таңда облыстық бюджеттен бөлінген қаражат жеткілікті. Дегенмен, қосымша қажеттілік туындаған жағдайда бұл мәселе облыстық мәслихаттың сессиясында қаралатын болады.