Қазақ елі тағы да спорттық биікті бағындырды. Қазақстан құрамасы Ислам елдерінің III халықаралық хоккей турнирінде Кубогының иегері атанды, деп хабарлайды Altainews.kz тілшісі.

Турнир маусым айының алғашқы жартысында Татарстан астанасы Қазан қаласында өтті. Жарыс Ислам елдері хоккейін дамыту ұйымының  қолдауымен ұйымдастырылған. Биылғы жарысқа Қазақстан, Қырғызстан, Өзбекстан, Ливан, Бахрейн, Иран және Оман елдерінен 8 әуесқой ерлер командасы қатысты.

Хоккейшілер 3х3 форматында бақ сынасты. Бұл ойын классикалық хоккейден кішірек мұз алаңында (34х18 м) өткізіледі және жылдам қарқынмен ерекшеленеді. Әр матч үш кезеңнен тұрды, әр кезең – 7 минут.

Қазақстан құрамасы А тобында өнер көрсетті. Бұл топта Қырғызстан, Ливан және Өзбекстан командалары болды. Ел намысын негізінен Өскеменнен шыққан бұрынғы кәсіби хоккейшілер қорғады. Команда сапында спорт шеберлері мен тәжірибелі жаттықтырушылардың тәрбиеленушілері бар.

Команда капитаны, турнирдің үздік ойыншысы атанған Алексей Зубов ойыннан кейін өз әсерімен бөлісті:

Төрт күнге созылған турнир Қазан қаласындағы «Татнефть Арена» мұз сарайында өтті. Барлығы 28 матч ойналды. В тобында Бахрейн, Иран, Оман және Ресей атынан Татарстан әуесқой құрамасы өнер көрсетті. Ислам елдерінің халықаралық хоккей турнирі жыл сайынғы турнирге айналып келеді. Ұйымдастырушылар келесі жарысты басқа елде өткізуді жоспарлап отыр. Қатысушылар мен қонақтар келесі турнирдің Өскеменде өту мүмкіндігін қолдап отыр. Аймақ басшысы бұл ұсынысты қарастыруға уәде берді.

Айта кетейік, ШҚО құрамасын қолдауда ірі кәсіпорындардың да үлесі бар. Соның ішінде «Казцинк» компаниясы бірнеше жылдан бері командаға қолдау көрсетіп келеді.

Қазақстан құрамасының бұл жеңісі елдегі әуесқой хоккейдің даму деңгейін көрсетіп қана қоймай, Шығыс Қазақстанда хоккей спортына жаңа серпін беретіні сөзсіз.

Дамир Омаров

Фото: Махаббат Ахметжанова

Видео: Руслан Акматалиев