Тарбағатай ауданындағы жиырмадан астам мектептің оқушылары Ұлы Жеңістің 80 жылдығына арналған «Ұлы Жеңіс: Ерлікке тағзым, ұрпаққа үлгі» атты жоспар аясында өткен «Әскердегі сарбазға хат» әлеуметтік челленджіне белсенді қатысты, деп хабарлайды Altainews.kz тілшісі.

Патриоттық бастама елімізде Отан алдындағы борышын өтеп жүрген сарбаздарға рухани қолдау көрсетіп, жас буын арасында әскери қызметке деген құрметті арттыруға бағытталған. Шараға қатысқан оқушылар сарбаздарға деген лебіздерін хатқа түсіріп қана қоймай, парақшаларын патриоттық нақышта безендіріп, ұлттық киім киіп келді.

Асусай мектебінің 11-сынып оқушысы Елжан Жансерікұлы, 10-сынып оқушылары Мансұр Тоқанов пен Айқын Мұратханов әскердегі ағаларына жүрекжарды тілектерін жолдады. Олар өз хаттарында туған жердің амандығын тілеп, сарбаздарға рух беретін жылы сөздерін арнады. Игі бастаманы басқа да ауыл мектептері жалғастырып, оқушылар жырақта жүрген туыстарына ізгі ниетпен хат жазды.

Шара қорытындысы бойынша барлық хаттар арнайы жинақталып, сарбаздарға жеткізілмек. Бұл — бір жағынан ел амандығын тілеп жүрген жас буынның жүрек үні, екінші жағынан – сарбаздарға деген ел ықыласының айқын көрінісі.