Шығыс Қазақстан облысында тәртіп сақшылары хабар-ошарсыз кеткен азаматтарды табу үшін ауқымды іздестіру жұмыстарын жалғастыруда. Іздеу Риддер қаласы мен Алтай өңіріне жақын жерлерде белсенді жүргізілуде, деп хабарлайды Altainews.kz тілшісі.

Құқық қорғау органдары елдімекендерді ғана емес, сонымен қатар жақын маңдағы орманды алқаптарды, таулы аумақтарды, өзен жағаларын, ескі ғимараттар мен саяжай учаскелерін түгел тексеріп жатыр. Іздеу жұмыстарына дрондар, қызметтік иттер тартылған. Сонымен бірге, еріктілер, құтқарушылар мен әскери қызметкерлер де жұмылдырылған.

ШҚО Полиция департаменті бұл жұмысқа жан-жақты күш салынып жатқанын атап өтті.

Қазіргі уақытта іздестіріліп жатқан азаматтардың бірі – 1982 жылы туған Иван Ушаков. Ол 14 наурыз күні таңғы сағат 08:00 шамасында үйінен шығып кетіп, содан бері оралмаған. Жақындарының айтуынша, жоғалған күні оның үстінде қара күртеше, қою сұр бас киім, сұр шалбар және қара кроссовка болған. Бойы шамамен 180 см, арық денелі, шашы мен сақалы қызыл-қоңыр түсті, көзі ашық жасыл.

Екінші іздестіріліп жатқан адам – Александр Воробьёв. Ол 2024 жылдың 9 қарашасында үйінен шығып, сол күйі қайтып келмеген. Үстінде қара күртеше, камуфляж шалбар, жасыл резеңке етік және қара бас киім болған.

Құқық қорғау органдары іздеу жұмысына белсенді қатысып жатқан барлық азаматтарға алғысын білдіріп, жоғалған жандарды табу үшін күш біріктіруге шақырады.