Алтай төрінде ұлттық спорт пен руханият тоғысты: Қатонқарағайда халықаралық фестиваль басталды
Шығыс Қазақстан облысының Қатонқарағай ауданында «Алтай – түркі әлемінің алтын бесігі» халықаралық фестивалі салтанатты түрде басталды. Ауқымды мәдени-спорттық шараның алғашқы күні ұлттық спорт жарыстары мен рухани-мәдени бағдарламаларды тоғыстырып, өңір тұрғындары мен алыс-жақыннан келген қонақтарға ерекше мерекелік көңіл күй сыйлады.
Фестиваль шымылдығы XXIV Халықтық спорт ойындары аясында ұйымдастырылған көкпар бәсекесімен түрілді. Таңғы сағат 08:00-де Қатонқарағай ауылындағы атшабарда ұлттық ойынның дүбірі басталып, облыстың қала-аудандарынан келген үздік командалар өзара бақ сынасты.
Көкпар – қазақ халқының ерлік пен ептілікті, батылдық пен бірлікті дәріптейтін ұлттық спорты. Бұл жолы да шабандоздар ат үстіндегі шеберліктерін, күш-қайраттарын және тактикалық дайындығын паш етіп, көрермендерге тартысты әрі әсерлі ойын сыйлады.
Топтық кезеңде Күршім мен Алтай аудандарының, Өскемен қаласы мен Үлкен Нарынның, Тарбағатай мен Зайсанның, сондай-ақ Риддер қаласы мен Қатонқарағай ауданының командалары өзара кездесті.
Әрбір кездесу жанкүйерлердің зор қызығушылығын тудырды. Ат тұяғының дүбірі мен шабандоздардың қайсарлығы ұлттық спорттың ерекше рухын сездіріп, жарыс алаңында нағыз тартысқа толы көріністер орын алды. Көрермендер өз командаларына жанкүйер болып, әрбір ұпайды зор ықыласпен қарсы алды.
Топтық кезеңнің қорытындысы бойынша үздік нәтиже көрсеткен командалар ертең өтетін шешуші кезеңге жолдама алады. Финалдық кездесулерде XXIV Халықтық спорт ойындарының жеңімпаздары мен жүлдегерлері анықталмақ.
Фестиваль тек спорттық жарыстармен ғана шектелмейді. Ұйымдастырушылар ұлттық руханиятты дәріптейтін мазмұнды мәдени бағдарламаларды да әзірлеген.
Алғашқы күннің маңызды оқиғаларының бірі – Берел ауылына жақын орналасқан тарихи Патшалар алқабында өтетін республикалық «Төр Алтай Ақтанын жырлайды» поэзия фестивалі.
Әдеби кеш қазақтың көрнекті лирик ақыны Ақтан Нұрбаевтың шығармашылығына арналмақ. Оның туған жерге деген сүйіспеншілікке, ұлттық құндылықтарға және адамгершілік қасиеттерге үндейтін өлеңдері қазақ әдебиетінің алтын қорынан орын алған.
Фестивальдің басты мақсаты – ұлттық руханиятты ұлықтау, тарихи-мәдени мұраны насихаттау, туған жерге деген сүйіспеншілікті арттыру және жастардың патриоттық тәрбиесін нығайту. Ұйымдастырушылардың айтуынша, мұндай жобалар ұлт әдебиетін дәріптеп қана қоймай, жас ұрпақтың тарихи санасын қалыптастыруға және рухани құндылықтарға деген қызығушылығын арттыруға ықпал етеді.
Поэзия мерекесіне еліміздің әр өңірінен белгілі ақын-жазушылар қатысады. Олардың қатарында Ербол Алшынбай, Индира Кереева, Еділбек Дүйсенов, Дидар Әлібек, Айбек Оралхан, Пержан Сайынбай, Асқархан Ақтай, Мұратхан Кенжеханұлы, Олжас Керейхан, Жеңіс Оразайұлы, Қызырбек Дүргінбайұлы, Есенбол Наубай, Естай Жанабай, Құмар Зиятхан және Мақсат Дәуілбайұлы бар.
Фестиваль аясында ақындардың шығармашылық кездесулері, поэзиялық оқулар, еркін пікір алмасулар мен әдеби сұхбаттар ұйымдастырылады. Бұл көрермендерге қазақ сөз өнерінің үздік үлгілерімен жақынырақ танысып, белгілі қаламгерлермен жүздесуге мүмкіндік береді.
Кешкі уақытта фестиваль қонақтарына арнайы концерттік бағдарлама ұсынылады. Сахнада Шығыс Қазақстан облыстық филармониясының шығармашылық ұжымы мен танымал өнерпаздары өнер көрсетеді. Концертте халық әндері, дәстүрлі күйлер және заманауи музыкалық шығармалар орындалып, ұлттық мәдениеттің сан қырлы болмысы көрініс табады.
Ұйымдастырушылардың айтуынша, «Алтай – түркі әлемінің алтын бесігі» халықаралық фестивалі жылдан-жылға ауқымы кеңейіп, халықаралық деңгейдегі маңызды мәдени алаңға айналып келеді. Бұл жоба түркі халықтарының мәдени байланысын нығайтуға, ұлттық спорт түрлерін кеңінен насихаттауға, өңірдің туристік әлеуетін арттыруға және Алтайдың тарихи-мәдени мұрасын әлемге танытуға бағытталған.
Фестивальдің алғашқы күні ұлттық спорттың тартысты бәсекесі мен рухани мазмұнға толы мәдени шараларды бір арнаға тоғыстырып, Алтай жерін нағыз мерекенің орталығына айналдырды. Көкпардың қызуы, поэзияның құдіреті мен әсем ән-күйдің үндестігі қонақтарға ұмытылмас әсер сыйлап, Алтайдың түркі дүниесіндегі тарихи әрі мәдени маңызын тағы бір мәрте айшықтай түсті.
