Әлемдегі ең жайлы 10 қала белгілі болды: рейтингте қай мегаполистер көш бастады?

1. Токио (Жапония)

Токио әлемдегі ең қауіпсіз мегаполистердің бірі саналады. Мұнда кішкентай балалардың мектепке өздері барып келуі қалыпты жағдай. Қоғамдық көлікте тыныштық сақталады, адамдар кезекті бұзбайды, ал қызмет көрсету мәдениеті әлемге үлгі ретінде көрсетіледі. Соған қарамастан, Токио инфрақұрылымын тоқтаусыз жаңартып келеді.

2. Лиссабон (Португалия)

Ерекше сәулеті мен жайлы атмосферасы Лиссабонды туристер ғана емес, көшіп келушілер үшін де тартымды етеді. Қалада соңғы жылдары қоғамдық көлік пен велосипед инфрақұрылымы қарқынды дамып, велосипедпен қатынайтын тұрғындар саны бірнеше есе артқан.

3. Вена (Австрия)

Вена мәдениетімен ғана емес, тұрғындарға қолайлы өмір сүру жағдайымен де ерекшеленеді. Мұнда әлеуметтік тұрғын үйлер салу дәстүрі әлі күнге дейін жалғасып келеді. Қала ескі тарихи ғимараттарды сақтай отырып, оларды заман талабына сай қайта жаңғыртуға ерекше көңіл бөледі.

4. Сидней (Австралия)

Соңғы жылдары Сидней үлкен өзгерістерді бастан өткерді. Жаңа метро желілері, жаяу жүргіншілерге арналған көшелер мен әлемдегі ең ірі балық базарларының бірі қаланың келбетін жаңартты. Ал жүзден астам жағажай Сиднейді табиғат пен мегаполис үйлескен ерекше қалаға айналдырады.

5. Мадрид (Испания)

Мадрид бүгінде Еуропадағы ең қарқынды дамып келе жатқан қалалардың бірі. Ашық аспан астындағы мейрамханалар, түнгі өмір, саябақтар мен қоғамдық кеңістіктер тұрғындардың өмір сапасын арттырған. Сонымен қатар қала тұрғындарының өмір сүру ұзақтығы Еуропадағы ең жоғары көрсеткіштердің қатарында.

6. Париж (Франция)

Париж соңғы жылдары жасыл қалаға айналуға басымдық беріп келеді. Мыңдаған ағаш отырғызылып, жүздеген шақырым велосипед жолы салынған. Қалада 400-ге жуық тәуелсіз кітап дүкені жұмыс істейді, сондықтан ол Еуропаның мәдени астаналарының бірі мәртебесін сақтап отыр.

7. Стокгольм (Швеция)

Стокгольмде табиғат қала өмірінің ажырамас бөлігі саналады. Қай ауданда тұрсаңыз да, саябақ, орман немесе суға шомылатын орын алыс емес. Сонымен қатар қала қоғамдық көлікті жаңартып, ағаштан салынатын жаңа тұрғын аудандарды дамытуға кіріскен.

8. Милан (Италия)

Милан бүгінде сән орталығы ғана емес, халықаралық бизнес пен гастрономияның да маңызды шаһарына айналды. Мұнда әлемнің түкпір-түкпірінен келген асханалар көбейіп, жаңа мейрамханалар мен кофеханалар жиі ашылып жатыр.

9. Барселона (Испания)

Барселона сәулеті, жасыл көшелері және қолайлы қоғамдық көлігімен ерекшеленеді. Қала билігі тұрғындардың жайлылығын сақтау үшін туристер ағынын реттеуге кіріскен. Сонымен қатар қоғамдық көлік желісі кеңейіп, жаңа жасыл аймақтар ашылып жатыр.

10. Амстердам (Нидерланд)

Амстердам велосипедпен жүруге ең қолайлы қалалардың бірі болып қала береді. Сонымен бірге ол технологиялық орталық ретінде де қарқынды дамып келеді. Жұмыс уақытының икемділігі мен өмір мен еңбек арасындағы тепе-теңдік бұл қаланы өмір сүруге ең жайлы орындардың қатарына енгізді.

Сарапшылардың пікірінше, жайлы қала дегеніміз – тек экономикасы мықты немесе зәулім ғимараттары көп мегаполис емес. Ең бастысы – тұрғындардың өзін қауіпсіз сезінуі, қоғамдық көліктің қолжетімді болуы, табиғаттың сақталуы және күнделікті өмірдің ыңғайлы ұйымдастырылуы.