Қазақстанда донорлық мәдениетін дамытуды мақсат еткен ерекше жоба – мейірімділік экспедициясы бастау алды. Республикалық қан қызметінің еріктілері Ермек Дүйсенханов пен Арман Сатимов елді аралап, қан тапсырудың маңыздылығын түсіндіруде. Олар 17 күндік автосапар барысында тек ірі қалаларда ғана емес, шалғай ауыл-аймақтарда да ақпараттық кездесулер өткізуде, деп хабарлайды Altainews.kz тілшісі.

Экспедиция барысында еріктілер әр өңірде жергілікті тұрғындармен және бұқаралық ақпарат құралдарының өкілдерімен кездесіп, шағын дәрістер оқып, қан донорлығы туралы ақпараттық материалдар таратты. Жобаның басты ерекшелігі — қан орталығының логотипі бар арнайы көлікпен жолға шыққан еріктілердің маршрутында алты облыс пен ондаған елді мекен бар.

Экспедиция барысында экология, ауылдық өңірлерді дамыту, тарихи мұраны сақтау сияқты өзекті мәселелер де көтеріліп жүр. Бұл жобаның кең ауқымды және жан-жақты екенін көрсетеді.

Сонымен қатар, дәрістер аяқталған соң тұрғындар Қан орталығының көлігіндегі арнайы картаға қызыл нүктелер жапсырып, өз қолдауын білдіруде. Бұл — қан тапсыру туралы ақпарат алған және оны қолдайтын азаматтардың санын білдіретін символ.

Жоба ел аумағындағы адам өміріне бейжай қарамайтын мыңдаған тұрғындарды қамтуды мақсат етіп отыр. Ал бұл сапар — мейірім мен үмітке толы жолдың басы ғана.