Шығыс Қазақстан облысының әкімі Нұрымбет Сақтағанов медицина қызметкерлерін кәсіби мерекелерімен құттықтап, олардың еңбегіне жоғары баға берді. Бұл туралы облыс әкімінің әлеуметтік желідегі парақшасында жарияланды.

Нұрымбет Аманұлы өңірде халыққа сапалы медициналық қызмет көрсету үшін ауқымды жұмыстар жүргізіліп жатқанын атап өтті. Оның айтуынша, облыста диагностикалық және емдеу әдістері үздіксіз жетілдіріліп, заманауи құрал-жабдықтар жаңартылып жатыр. Қалалар мен ауылдық жерлерде жаңа ауруханалар мен емханалар салынып, қолжетімділік артуда.

Сонымен қатар өңір дәрігерлері мен орта буын медицина мамандары шетелдік жетекші клиникаларда тәжірибе жинап, озық әдістемелерді меңгеріп, күнделікті тәжірибеде сәтті қолданып келеді. Мемлекет тарапынан дәрігерлердің еңбек және тұрмыс жағдайын жақсартуға да басымдық беріліп отыр: ауылдық жерлерде баспана беру, көтермелеу, мансаптық өсу және жас мамандарды қолдау шаралары жүйелі іске асуда.

Айта кетейік, Шығыс Қазақстанда медицина саласын дамытудың кешенді шаралары биыл да жалғасын таппақ. Мамандарды қолдау және жаңа медициналық инфрақұрылымды дамыту — облыс басшылығының басты назарында.